मतदान केंद्रांचे ‘गुगल मॅपिंग’

िअहमदनगर : जिल्ह्यातील विधानसभा निवडणुकीसाठी असलेल्या मतदान केंद्रांचे गुगल मॅपिंग करण्यात येणार असून, निवडणुकीच्यादृष्टीने केंद्र सक्षम करण्यात येतील, अशी माहिती जिल्हाधिकारी अनिल कवडे यांनी शुक्रवारी पत्रकार परिषदेत दिली़
नाशिक पदवीधर मतदारसंघ निवडणूक मतदार यादी अद्ययावतीकरण सुरू करण्यात आले आहे़ निवडणुकीच्या प्रारुप मतदारयादीत ८९ हजार ८७२ मतदार असून, त्यापैकी ७ हजार ८७२ मतदार वगळण्यात आले आहेत़ त्याचबरोबर नव्याने १६ हजार मतदारांचा समावेश झाला आहे़ यापैकी ८ हजार ८२२ मतदारांच्या १ ते २० मुद्यांची माहिती प्रशासनास प्राप्त झाली असून, उर्वरित मतदारांना माहिती देण्यासाठी २५ जून अंतिम मुदत आहे़ त्यापूर्वी माहिती घेण्यासाठी तलाठी, मंडलाधिकारी मतदारांच्या घरोघरी जावून माहिती घेणार असल्याचे कवडे म्हणाले़ पदवीधर मतदारसंघ निवडणुकीसोबतच राष्ट्रीय मतदार यादीच्याही शुद्धीकरणाची मोहीम १ एप्रिल ते ३१ आॅगस्ट या काळात सुरू होणार आहे़ मतदारयादीतील मयत, स्थलांतरीत, दुबार मतदारांचा शोध घेऊन ही नावे वगळण्यात येणार आहेत़ मतदारांचे छायाचित्र दुरुस्त करणे, नाव, वय, स्वाक्षरी, पत्ता, आधारकार्ड क्रमांक, मोबाईल क्रमांक यांसारख्या दुरुस्त्या करण्यात येणार आहेत.त्याचबरोबर १८ ते १९ वर्षे पूर्ण झालेल्या युवकांची नावनोंदणी करण्यात येणार आहे़
मतदान केंद्रांतील सुसूत्रीकरण
जल्ह्यात १२ विधानसभा मतदारसंघासाठी ३ हजार ५६७ मतदान केंद्र आहेत़ केंद्रांच्या हद्दी निश्चित करणे, नवीन मतदान केंद्र प्रस्तावित करणे, केंद्रांवरील सुविधा, सुरक्षेच्यादृष्टीने उपाययोजना, पोलीस ठाणे यांसारख्या सुधारणा करण्यात येणार आहेत,तसेच अक्षांश व रेखांश विषयक माहिती, मतदान केंद्राचा डिजिटल नकाशा, गुगल मॅपिंग, या सॉफ्टवेअर प्रणालीमध्ये अपलोड करणे व हद्दी निश्चित करण्यात येणार असल्याचे यावेळी सांगण्यात आले़
पदवीधर मतदार संघ निवडणूक मतदारयादीतील मतदारांनी १ ते २० मुद्यांची माहिती सादर करून प्रशासनास सहकार्य करावे.
-अनिल कवडे, जिल्हाधिकारी
या चुका होणार दुरुस्त
नाव किंवा अपूर्ण आडनाव असणे
यादीतील भाग क्रमांक नसणे
विभाग क्रमांक नमूद नसणे
घरक्रमांकाचा उल्लेख नसणे
मतदाराचे नाते किंवा इतर चिन्हे
मतदाराच्या नातेवाईकाचे नाव नसणे
ओळखपत्र क्रमांक १० अंकांपेक्षा कमी असणे
वय १८ पेक्षा कमी असणे
ओळखपत्र दुबार असणे