नगरमधील सिग्नलची लुकलुक थांबली

अहमदनगर : वाहतूक व्यवस्थेच्या नियंत्रणासाठी शहरातील प्रमुख चाैकात सिग्नल बसविण्यात आले होते. मात्र हे सिग्नल महापालिकेच्या दुर्लक्षामुळे बंद पडले आहेत. त्यामुळे चौकांमधून भरधाव वेगाने जात असून, बंद सिग्नल अपघातांनाच निमंत्रण देत आहेत. अपघात टाळण्यासाठी बंद पडलेले सिग्नल सुरू करण्याची गरज आहे.

शहरतील कायनेटिक चौक, सक्कर चौक, स्वस्तिक चौक, एम्पिरीयल चौक, मार्केट यार्ड चौक, चांदणी चौक, जीपीओ चौक, पत्रकार चौक, प्रेमदान चौक, नागापूर चौक, एकवीरा चौक, भिस्तबाग चौक या चौकांमधील सिग्नल बंद आहेत. लॉकडाऊनच्या काळात वाहतूक नसल्याने सिग्नल बंद केले गेले. अनलॉकनंतर वरील चौकांतील सिग्नल सुरू झाले नाहीत. त्यामुळे वाहतूक व्यवस्थेवर नियंत्रण ठेवणे वाहतूक शाखेला अशक्य होत आहे. चौकातील बंद सिग्नलमुळे ऐन चौकातच लहान मोठे अपघात होत आहेत. सिग्नल बंद असल्याने वाहन पुढे दामटण्याची स्पर्धा होऊन वाहतूक कोंडी तरच होतेच. शिवाय अपघाताची शक्यता नाकारता येत नाही. विशेष म्हणजे चौक ओलांडताना पादचाऱ्यांची फजिती होते. वाहनांच्या कोंडीत पदचारी अडकण्याच्या घटना घडत आहेत. औरंगाबाद-पुणे महामार्गावर सर्वाधिक वाहतूक असते. या मार्गावर अशोका हॉटेल ते सक्कर चौकापर्यंत उड्डाणपुलाचे काम सुरू आहे. हे काम सुरू असल्याने या मार्गावर वारंवार वाहतूक कोंडी होते.

...

प्रमुख महामार्गावरील सिग्नल बंद

शहरातून जाणाऱ्या औरंगाबाद, मनमाड, कल्याण, सोलापूर महामार्गावरील सक्कर चौक, चांदणी चौक, पत्रकार चौक, प्रेमदान चौक, नागापूर चौक, जीपीओ अशा चौकांतील सिग्नल बंद आहेत.

....

वाहतूक कोंडीने गाठला कळस

शहरात सुरू असलेले उड्डाणपुलाचे काम, महापालिकेचे अक्षम्य दुर्लक्ष यामुळे शहरातील दिल्लीगेट, सक्कर चौक, प्रेमदान चौक, एकवीरा चौक, चांदणी चौक, जीपीओ चौकांत वाहतुकीची वारंवार कोंडी होत आहे. त्याचा त्रास सर्वसामान्य नगरकरांना होत आहे.

.....

उड्डाणपुलाच्या कामासाठी बंद असलेले सिग्नल

सक्कर चौक, स्वस्तिक चौक, एम्पिरियल चौक, मार्केट यार्ड चौक

....

सावेडीतील सिग्नल बंद

एकवीरा चौक, भिस्तबाग चौक

.....

कंपनीने देखभाल दुरुस्ती केली बंद

शहरातील सिग्नलची देखभाल व दुरुस्ती लार्सन एण्ड टुब्रो कंपनी स्वत:हून करत होती. परंतु, या कंपनीने दुरुस्तीचे काम थांबविले असून, शहरातील सिग्नल बंद झाले आहेत.

....

- शहरातील बंद पडलेले सिग्नल सुरू करण्याबाबत महापालिकेला वेळावेळी पत्र देण्यात आले आहे. परंतु, अद्याप सिग्नल सुरू झालेले नाहीत. सिग्नल सुरू करण्याची आवश्यकता आहे. सिग्नल बसविल्यास वाहतुकीचे व्यवस्थापन करणे शक्य होईल.

- राजेंद्र भोसले, वाहतूक शाखा निरीक्षक, अहमदनगर

.....

- शहरातील सिग्नलच्या दुरुस्तीसाठी निविदा मागविण्यात आल्या होत्या. परंतु, प्रतिसाद मिळाला नाही. काही सिग्नल उड्डाणपुलाच्या कामामुळे बंद आहेत. उर्वरित सिग्नल सुरू करण्यासाठी योग्य ती कार्यवाही करण्यात येईल.

- शंकर गोरे, आयुक्त, महापालिका