अहमदनगर : पाथर्डी तालुक्यातील एका शेतकऱ्याला पती-पत्नीनेच हनीट्रॅपमध्ये अडकवून त्याला दोन लाख रुपयांना गंडा घातल्याचा धक्कादायक प्रकार समोर आला आहे. याप्रकरणी पीडित शेतकऱ्याने रविवारी (दि.१८) एमआयडीसी पोलीस ठाण्यात दिलेल्या फिर्यादीवरून तिघांविरोधात गुन्हा दाखल करण्यात आला आहे.
याप्रकरणी गणेश छगन गिऱ्हे (रा. राघोहिवरे, ता. पाथर्डी) याच्यासह वडगाव गुप्ता येथील पती- पत्नीविरोधात गुन्हा दाखल करण्यात आला असून तिघेही फरार आहेत. फिर्यादी पीडित शेतकरी हा पाथर्डी तालुक्यातील रहिवासी असून त्याचा शेतीसह पेेंटिंगचाही व्यवसाय आहे. आरोपी गिऱ्हे हा फिर्यादीच्या ओळखीचा आहे. गिऱ्हे याने हनीट्रॅप करणाऱ्या महिलेला फिर्यादीचा मोबाईल क्रमांक दिला होता. त्यानंतर त्या महिलेने फिर्यादीला संपर्क करून त्याच्याशी मैत्री वाढवली. १५ जून रोजी सायंकाळी फिर्यादीस त्या महिलेने तिच्या वडगावगुप्ता येथील घरी बोलावून घेतले. तेथे त्याच्याशी जवळीक साधून फोटो काढले. घरात हे दोघे एकत्र असतानाच त्यावेळी महिलेचा पती तेथे आला. फिर्यादी व महिलेला एकत्र पकडले असे भासवून फिर्यादीला घटनास्थळी लाकडी दांड्याने मारहाण करण्यात आली. तसेच त्याच्याकडील ५ हजार रुपये हिसकावून घेत गुन्हा दाखल करण्याची धमकी दिली. त्यानंतर आरोपींनी मध्यस्थी म्हणून गणेश गिऱ्हे याला बोलावून घेतले. गुन्हा दाखल करण्याची धमकी देत आरोपींनी फिर्यादीकडून प्रत्येकी दोन लाख रुपयांचे तीन धनादेश घेतले. तसेच २ लाख रुपयांची रोख खंडणी घेतली असे याप्रकरणी दिलेल्या फिर्यादीत म्हटले आहे. याप्रकरणी सहायक पोलीस निरीक्षक युवराज आठरे हे पुढील तपास करीत आहेत.
-----------------
अनेकांना ब्लॅकमेल केल्याचा संशय
नगर तालुक्यातील जखणगाव व अकोले येथील हनीट्रॅपच्या घटना ताज्या असतानाच वडगावगुप्ता येथेही असाच प्रकार घडला आहे. त्या पती-पत्नीने अशाच पद्धतीने अनेकांना ब्लॅकमेल करून पैसे उकळल्याचा पोलिसांना संशय आहे. आरोपींना अटक झाल्यानंतर चौकशीतून अशा अनेक घटना समोर येण्याचीही शक्यता वर्तविण्यात येत आहे.