अहमदनगर : नेवासा तालुक्यातील शनी शिंगणापूर देवस्थानच्या अकरा विश्वस्तांच्या निवडीची घाेषणा सहाय्यक धर्मदाय आयुक्त हिरा शेळके यांनी बुधवारी केली. मुलाखतीद्वारे विश्वस्तांची निवड करण्यात आली असून अध्यक्षपदासाठी लवकरच विश्वस्तांची बैठक होणार असल्याचे सांगण्यात आले.
शनी शिंगणापूर देवस्थानच्या विश्वस्त मंडळाची मुदत ५ जानेवारी २०२१ रोजी संपणार आहे. त्यापूर्वी विश्वस्त मंडळाची प्रशासनाकडून निवड करण्यात आली आहे. येथील सहाय्यक धर्मदाय आयुक्त शेळके यांच्या मार्गदर्शनाखाली इच्छुकांच्या मुलाखती घेण्यात आल्या. मुलाखतीचा बुधवार शेवटचा दिवस होता. गेल्या तीन दिवसांत विश्वस्त पदासाठी एकूण ८४ इच्छुकांनी मुलाखती दिल्या. मुलाखती दिलेल्यांतून अकरा जणांची निवड करण्यात आली. नेवासा तालुक्याचे नेतृत्व जलसंधारणमंत्री शंकरराव गडाख हे करीत आहेत. त्यांच्याकडून अध्यक्षपदासाठी कुणाचे नाव सुचविले जाते, याची उत्सुकता आहे.
शिंगणापूर देवस्थान ताब्यात घेण्याचा निर्णय तत्कालीन मुख्यमंत्री देवेंद्र फडणवीस यांच्या कार्यकाळात घेण्यात आला होता. परंतु, तसा आदेश निघाला नाही. दरम्यान, राज्यात सत्तांतर होऊन महाविकास आघाडीचे सरकार स्थापन झाले. नेवासाचे आमदार शंकरराव गडाख यांनी सर्वप्रथम सेनेला पाठिंबा जाहीर केला होता. गडाख हे सेनेकडून जलसंधारणमंत्री आहेत. महाविकास आघाडी सरकारने शिंगणापूर देवस्थानबाबत कुठलाही निर्णय घेतला नाही. विद्यमान मंडळाची मुदत येत्या ५ जानेवारी रोजी संपणार आहे. विश्वस्त मंडळाचा कार्यकाळ पाच वर्षांचा असतो. नवीन वर्षात मंडळाची मुदत संपत असल्याने नवीन मंडळाची निवड जाहीर करण्यात आली आहे. या ११ सदस्यांतून अध्यक्षांची निवड केली जाणार आहे.
...
-देवस्थान नावारूपाला आणण्यासाठी गावातील प्रत्येक कुटुंबाचा त्याग आहे. परंपरा जपण्यासाठी गावकरी बिगर दरवाजाच्या घरात राहतात. जुन्या जाणत्या लोकांनी जी घटना केली व हिंदू धर्माची परंपरा चालू केली होती. ती राखण्याचे मोठे काम मुख्यमंत्री उद्धवजी ठाकरे यांनी केले आहे. ‘पानस नाला’ प्रकल्पाचा लवकरच मुख्यमंत्र्यांच्या हस्ते शुभारंभ करण्यात येणार आहे. तसेच येथील विकासासाठी विविध उद्योगपतींशी चर्चा सुरू आहे.
- शंकरराव गडाख, जलसंधारण मंत्री
...
हे आहेत निवड झालेले विश्वस्त
बाळासाहेब बन्सी बोरुडे, विकास नानासाहेब बानकर, छबुराव नामदेव भूतकर , पोपट लक्ष्मण कुऱ्हाट, शहाराम रावसाहेब दरंदले, भागवत सोपानराव बानकर, सुनीता विठ्ठल आढाव , दीपक दादासाहेब दरंदले, शिवाजी अण्णासाहेब दरंदले, पोपट रामचंद्र शेटे, आप्पासाहेब ज्ञानदेव शेटे यांची मुलाखत होऊन नियुक्ती झाली आहे.