अहिल्यानगर जिल्ह्यातील चार पालिकांची निवडणूक पुढे ढकलली; नवीन कार्यक्रमानुसार होणार निवडणूक प्रक्रिया

अहिल्यानगर जिल्ह्यातील बारा पालिकांसाठी २८९ जागांसाठी २ डिसेंबर रोजी मतदान प्रक्रिया पार पडणार होती परंतु निवडणुकीत काही ठिकाणी उमेदवारांविरोधात न्यायालयात अपील दाखल करण्यात आले आहे.

अहिल्यानगर - जिल्ह्यातील कोपरगाव, देवळाली, नेवासा आणि पाथर्डी या चार ठिकाणी नगराध्यक्षपदाच्या उमेदवाराबद्दल कोर्टात अपील असल्याने संपूर्ण निवडणूक नवीन कार्यक्रमानुसार होणार आहे.

अहिल्यानगर जिल्ह्यातील बारा पालिकांसाठी २८९ जागांसाठी २ डिसेंबर रोजी मतदान प्रक्रिया पार पडणार होती परंतु निवडणुकीत काही ठिकाणी उमेदवारांविरोधात न्यायालयात अपील दाखल करण्यात आले आहे. त्यामुळे ज्या उमेदवारांच्या अपीलावर २३ नोव्हेंबर रोजी किंवा त्यानंतर आदेश पारीत झाले असतील, त्या ठिकाणीच्या संबंधित सदस्यांच्या जागेकरिता तसेच अध्यक्षपदाबाबत निकाल असलेल्या नगरपरिषद-नगरपंचायतीच्या निवडणुका नवीन कार्यक्रमानुसार होणार आहेत.

जिल्ह्यातील पाथर्डी, नेवासा, कोपरगाव व देवळाली या चार पालिकांच्या नगराध्यक्षसह सदस्य पदावर न्यायालयात अपील दाखल झाले होते. त्यामुळे आयोगाच्या नवीन अध्यादेशानुसार येथे निवडणूक प्रक्रिया नव्याने राबवली जाणार आहे तसेच जिल्ह्यातील श्रीगोंदा, श्रीरामपूर व राहुरी पालिकेतील एक सदस्य जागा व जामखेड व संगमनेर पालिकेच्या दोन सदस्यांच्या जागेची निवडणूक नवीन कार्यक्रमानुसार होणार आहे. यासंदर्भात जिल्हाधिकारी डॉ. पंकज आशिया आज दुपारी बैठक घेऊन या संदर्भातील अंतिम निर्णय घेणार आहेत. 

पुढे ढकललेल्या नगरपरिषद आणि नगरसेवक पदाच्या निवडणूक प्रक्रियेमध्ये ४ डिसेंबर रोजी जिल्हाधिकारी निवडणूक कार्यक्रम जारी करतील. १० डिसेंबरपर्यंत उमेदवारी अर्ज माघार घेण्यासाठी मुदत, ११ डिसेंबर रोजी निवडणूक चिन्ह वाटप तसेच निवडणूक लढवणाऱ्या अंतिम उमेदवाराची यादी प्रसिद्ध केले जाईल. २० डिसेंबर रोजी मतदान, तर २१ डिसेंबर रोजी मतमोजणी होणार आहे.