राज्यात तत्कालीन मुख्यमंत्री देवेंद्र फडणवीस यांनी २५ सप्टेंबर २०१६ ला स्वर्गीय अण्णासाहेब पाटील यांच्या जयंतीनिमित्त माथाडी कामगारांच्या मेळाव्यात अण्णासाहेब पाटील आर्थिक मागास विकास महामंडळाकरिता २०० कोटी रुपयांचा भरीव निधी देण्याची घोषणा केली होती. राज्यांमध्ये मराठा क्रांती मोर्चाच्या मागणीवरून २०१७ मध्ये मराठा समाजाकरिता अण्णासाहेब पाटील आर्थिक मागास विकास महामंडळ नवीन तीन योजनांची घोषणा करून भरघोस आर्थिक मदतीची तरतूद केली. त्या अनुषंगाने नागपूर अधिवेशनात २०१६-१७ मध्ये २०० कोटी रुपये व २०१७-१८ च्या अर्थसंकल्पीय अधिवेशनामध्ये २०० कोटी रुपये अशी ४०० कोटी रुपयांची भरघोस निधीची तरतूद करण्यात आली होती. त्या रकमेतील १०० कोटी रुपये महामंडळास वर्ग करावेत, अशी मागणी महामंडळाने शासनाकडे केली. त्यानुसार २०१९ मध्ये ७० कोटी रुपये निधी महामंडळाला शासनाकडून वर्ग करण्यात आला. राज्यामध्ये महामंडळाच्या योजनेंतर्गत २१ हजार ७३१ लाभार्थ्यांना बँकांकडून कर्ज वाटप करण्यात आले आहे.त्या नुसार महामंडळाकडून लाभार्थ्यांना ८९ कोटी ८५ लाख रुपयांचा व्याज परतावा करण्यात आलेला आहे.
महामंडळामार्फत विविध योजनांचा लाभ घेत असताना ५ वर्षे मुदत आहे. ती ७ वर्षे करणे आणि ज्यांनी योजनेतून लाभार्थ्यांचे कर्ज घेतलेले आहे व त्यांची परत दोन वर्षे नियमितपणे लाभार्थ्यांनी केली आहे, त्यांना उद्योग वाढवण्यासाठी वाढीव कर्ज घेता येईल असाही महामंडळाचा प्रयत्न करावा. अशा मागण्या निवेदनात करण्यात आल्या आहेत.
....................
मराठा समाजातील विद्यार्थ्यांना या योजनेतून कर्ज द्यावे
मराठा समाजातील विद्यार्थांचे शैक्षणिक कर्ज हे कै.अण्णासाहेब पाटील आर्थिक मागास विकास महामंडळामार्फत देण्यात यावे.
माजी अध्यक्ष नरेंद्र पाटील यांनी कै.अण्णासाहेब पाटील आर्थिक मागास विकास महामंडळाचे अध्यक्ष असताना संपूर्ण महाराष्ट्रातील तालुके दौरे करून २०,००० मराठा उद्योजक तयार केले आहेत. भविष्यकाळात एक लाख मराठा उद्योजक तयार करण्यासाठी नरेंद्र पाटील यांची पुन्हा अध्यक्षपदी निवड करण्याचीही मागणी करण्यात आली.