अहमदनगर : राज्यात कोरोनासोबतच झिका व्हायरसचाही धोका वाढताना दिसत आहे. यापासून बचावाच्या दृष्टिकोनातून आरोग्य विभागाने नगर जिल्ह्यात फवारणीचे निर्देश दिले आहेत. नागरिकांनीही आवश्यक खबरदारी घ्यावी, असे आवाहन आरोग्य विभागातर्फे करण्यात आले आहे.
कोविडच्या तिसऱ्या लाटेचा धोका राज्यात वर्तविला जात आहे. त्यात पावसाळा असल्याने आता डासांचा प्रादुर्भावदेखील वाढला आहे. डासांपासून झिका हा विषाणूजन्य आजार बळावला आहे. सध्या या विषाणूचे १३ रुग्ण केरळमध्ये आढळले असल्याने पुन्हा एकदा धोक्याची घंटा वाजली आहे. त्याअनुषंगाने आरोग्य विभागाने उपाययोजना सुरू केल्या आहेत. पावसाळ्याच्या पार्श्वभूमीवर डासांची उत्पत्ती रोखण्यासाठी जिल्ह्यातील शहरी व ग्रामीण भागातील डबक्यांमध्ये फवारणी करणे गरजेचे आहे. त्या अनुषंगाने आरोग्य विभागातर्फे जिल्ह्याच्या आरोग्य यंत्रणेला फवारणी करण्याचे निर्देश दिले आहेत.
---------
कशामुळे होतो?
झिका व्हायरसचा आजार हा डेंग्यूप्रमाणेच डासांपासून होतो. डास चावल्यानंतर झिका आजाराची लागण होते. त्यामुळे डासांपासून स्वत:चे संरक्षण करणे हाच एकमेव उपाय असल्याचे तज्ज्ञांचे मत आहे.
----------
झिका व्हायरसची लक्षणे काय?
झिकाची लक्षणे साधारण डेंग्यू आजारासारखीच आहेत.
यात ताप येणे, अंगावर लाल रंगाचे डाग.
डोळे येणे, सांधे व स्नायूदुखी.
थकवा आणि डोकेदुखी.
---------------
उपाययोजना काय?
सध्या झिका व्हायरसवर कोणतीही लस किंवा ठोस उपचार नाहीत. झिका व्हायरस आपल्या रोगप्रतिकारक शक्तीवर गंभीर परिणाम करताे. अशा परिस्थितीत स्वत:ची रोगप्रतिकार शक्ती चांगली ठेवणे आणि डास वाढू न देणे आवश्यक आहे.
---------------
डेंग्यूप्रमाणेच झिका व्हायरसदेखील डासांपासूनच पसरतो. त्या अनुषंगाने सर्व प्राथमिक आरोग्य केंद्र, ग्रामीण रुग्णालये, उपजिल्हा रुग्णालये, जिल्हा रुग्णालय या ठिकाणी ताप, डेंग्यू ताप, चिकुनगुण्या आजाराची औषधे उपलब्ध आहेत. इतरही आवश्यक उपाययोजना करण्यात येत आहेत.
- डाॅ. दादासाहेब साळुंके, जिल्हा हिवताप अधिकारी