अहमदनगर : छत्रपती शिवाजी महाराज यांच्याबद्दल वादग्रस्त वक्तव्य केल्याप्रकरणी गुन्हा दाखल असलेला महापालिकेतील बडतर्फ उपमहापौर श्रीपाद छिंदम याच्याविरोधात सोमवारी जिल्हा न्यायालयात दोषारोपपत्र दाखल करण्यात आले असल्याचे तपासी अधिकारी किरण सुरसे यांनी सांगितले.
६० पानांचे हे दोषारोपपत्र असून यात सहा साक्षीदारांचा समावेश आहे. फेब्रुवारी २०१८ मध्ये फोनवरील संभाषणादरम्यान छिंदम याने छत्रपती शिवाजी महाराज यांच्याबद्दल केलेल्या आक्षेपार्ह वक्तव्याची एक ऑडिओ क्लिप सोशल मीडियावर व्हायरल झाली होती. याबाबत शिवसेनेचे शहरप्रमुख दिलीप सातपुते यांनी दिलेल्या फिर्यादीवरून छिंदम याच्याविरोधात तोफखाना पोलीस ठाण्यात गुन्हा दाखल झाला होता. या गुन्ह्याचा सहायक निरीक्षक किरण सुरसे यांनी तपास केला. गुन्हा दाखल झाला तेव्हा छिंदम हा महापालिकेत उपमहापौर पदावर होता. शासकीय लोकसेवक पदावर कार्यरत असलेल्या व्यक्तीच्याविरोधात गुन्हा दाखल झाल्यानंतर त्याचे दोषारोपपत्र दाखल करण्यासाठी गृहविभागाची परवानगी घ्यावी लागते. याबाबत तपासी अधिकारी सुरसे यांनी गृहविभागाला पत्रव्यवहार करून पाठपुरावा केला. गृहविभागाचे उपसचिव संजय खेडेकर यांची परवानगी मिळाल्यानंतर हे दोषारोपपत्र सोमवारी दाखल करण्यात आले आहे.
---------------------
आवाजाचा नमुना ठरणार महत्त्वाचा पुरावा
छिंदम याच्याविरोधात गुन्हा दाखल झाल्यानंतर पोलिसांनी व्हायरल झालेली ऑडिओ क्लिप आणि छिंदम याच्या आवाजाचा नमुना नाशिक येथील प्रयोगशाळेत तपासणीसाठी पाठविला होता. क्लिपमधील आवाज आणि छिंदमच्या आवाजात समानता असल्याचा अहवाल प्रयोगशाळेने पोलिसांना दिला आहे. त्यामुळे खटल्यात हा तांत्रिक पुरावा महत्त्वाचा ठरणार आहे.