संगमनेर : संगमनेर बसस्थानकात पार्किंगची सोय उपलब्ध आहे. मात्र, तरीही मोठ्या संख्येने वाहन चालक त्यांची दुचाकी, चारचाकी वाहने बसस्थानकाच्या आवारात, प्रवेशद्वारासमोरचच उभी करतात. त्यामुळे स्थानकात येणाऱ्या-जाणाऱ्या बसला अडथळा निर्माण होऊन अनेकदा रस्त्यावर वाहतूक कोंडी झाल्याचे पाहायला मिळते.
पुणे, नाशिक, मुंबई या बड्या शहरांच्या मध्यावर संगमनेर असल्याने येथे नेहमीच वर्दळ असते. पूर्वीच्या तुलनेत सर्वच प्रकारच्या वाहनांची संख्या वाढली आहे. वाहनतळासंदर्भात संगमनेर नगर परिषदेकडून धोरण ठरविले गेले नसल्याने वाहन चालक जागा मिळेल तेथे आपली वाहने उभी करतात. परिणामी अनेक ठिकाणी वाहतुकीची मोठी कोंडी झालेली पाहायला मिळते. पार्किंगची समस्या शहरात अनेक ठिकाणी सारखीच आहे.
नव्याने संगमनेर बसस्थानक आणि व्यापारी संकुल बांधण्यात आले. व्यापारी संकुलासमोर काही प्रमाणात वाहने उभी राहतील, अशी पार्किंगची सोय आहे. मात्र, तरीही बसस्थानकाच्या आवारात मोठ्या संख्येने खासगी दुचाकी, चारचाकी वाहने नेहमीच उभी असतात. अनेक वाहनचालक आपली वाहने बसस्थानकाच्या प्रवेशद्वाराजवळ उभी करतात. त्यामुळे स्थानकात जाणाऱ्या अथवा बाहेर पडणाऱ्या बसला अडथळा होतो. बसचालक हॉर्न वाजवून वैतागून जातात. अखेर चालकालाच बस मागे घेऊन वळवून नेण्याशिवाय पर्याय नसतो.
बसस्थानकाच्या दुसऱ्या प्रवेशद्वाराजवळ भुयारी पार्किंगची सोय उपलब्ध आहे. परंतु नियोजनाचा अभाव असल्याने पार्किंग असूनही त्याचा वापर होत नाही. येथे पार्किंग सुरू केल्यास रस्त्यांवर उभ्या केल्या जाणाऱ्या वाहनांमुळे होणाऱ्या वाहनकोंडीचा प्रश्न सुटू शकतो. त्यासाठी तातडीने प्रयत्न करणे गरजेचे आहे.
-------------------
बसस्थानकाच्या आवारात, प्रवेशद्वारासमोर मोठ्या संख्येने दुचाकी, चारचाकी वाहने उभी करणाऱ्यांना प्रतिबंध करण्यासाठी संगमनेर आगारातील व्यक्तीची नेमणूक करण्यात आली आहे. मात्र, खासगी वाहन चालक या व्यक्तीला जुमानत नाहीत. काही जण त्याच्याशी वाद घालतात. दहा मिनिटांत जाऊन येतो. असे सांगत स्थानकाच्या आवारात अनेक जण आपली वाहने उभी करून निघून जातात.
--------------
संगमनेर बसस्थानक परिसरातील पार्किंग व्यवस्था अत्यंत अपुरी असल्याने वाहनांची कोंडी होते. अकोले रस्त्याला असलेल्या दुसऱ्या बाजूच्या प्रवेशद्वाराजवळ असलेली भुयारी पार्किंग सुरू करावी. त्यामुळे पार्किंगची समस्या काही प्रमाणात सुटेल व नागरिकांनाही त्याचा फायदा होईल.
कुलदीप ठाकूर, जिल्हा संयोजक, बजरंग दल
..........
star 1102star 1102