केडगाव : कोरोनाच्या वाढत्या प्रादुर्भावामुळे गेल्या २५ दिवसांपासून बंद असणारा नगर बाजार समितीचा नेप्ती उपबाजार भाजीपाला व फळांच्या खरेदी-विक्रीने गजबजून गेला. बुधवारी पहिल्याच दिवशी ३० टक्केच आवक झाली. कोरोनाच्या नियमांचे कडक पालन व्हावे यासाठी पोलीस बंदोबस्तात व्यवहार पार पडले.
नगर शहराबरोबरच ग्रामीण भागातही कोरोनाचा वाढता प्रभाव लक्षात घेऊन जिल्हाधिकाऱ्यांनी १ मे पासून नगर बाजार समितीमधील मुख्य बाजाराबरोबरच नेप्ती उपबाजार समितीत चालणारा फळे व भाजीपाला बाजार बंद केला होता. नुकतीच जिल्हाधिकाऱ्यांनी पहाटे ४ ते सकाळी ७ या वेळेत भाजीपाला व फळे बाजार भरविण्यास परवानगी दिली. त्यासाठी काही अटी व शर्तींचे नियम घालून दिले. त्याची अंमलबजावणी करीत नगर बाजार समितीने आजपासून नेप्ती उपबाजार येथे फळे व भाजीपाला बाजार भरविण्यास सुरुवात केली.
मोठ्या कालखंडानंतर बाजार सुरू झाल्याने पहिल्या दिवशी फक्त ३० टक्के आवक होती. खरेदीदार व आडतदार यांनी नियमांचे कठोर पालन करावे यासाठी पोलीस बंदोबस्तात बाजार भरविला गेला. यासाठी प्रथम समितीच्या सर्व कर्मचाऱ्यांची रॅपिड चाचणी घेण्यात आली. आत येणाऱ्या प्रत्येकाचे तापमान व ऑक्सिजन पातळी यांचीही तपासणी करण्यात आली. सकाळी २३३ क्विंटल इतक्या भाजीपाल्याची आवक झाली तर ३६ क्विंटल फळांची आवक झाली.
-----
भाजीपाल्याची आवक व दर असे..
(आवक आणि दर क्विंटलचा)
शेतमाल आवक दर
टोमॅटो ३३ ६००
वांगी ४ १०००
फ्लावर १२ २०००
कोबी ९ ६५०
दोडका ३ २५००
कारले ३ २५००
भेंडी ३ २५००
बटाटे ८६ ८५०
लसुण १४ ५५००
हिरवी मिरची १७ ३०००
भुईमूग ३ ३०००
लिंबू २ ३५००
अद्रक ९ १७००
गाजर ३ १२५०
भोपळा ३ ७५०
मेथी ७ ११००
कोथिंबीर १० ६५०
डांगर ३ ७५०
पालक ४ ६००
शेपू ३ ८००
-------
नगर बाजार समितीच्या नेप्ती उपबाजार येथे आजपासून जिल्हाधिकारी यांच्या आदेशाने व त्यांनी घालून दिलेल्या सर्व नियमांचे पालन करीत भाजीपाला व फळांचा बाजार सुरू करण्यात आला. सामाजिक अंतर रहावे यासाठी पोलीस बंदोबस्त मागविण्यात आला आहे.
-अभय भिसे,
सचिव, बाजार समिती, नगर
----
फोटो आहे