आत्महत्येची धमकी देत पंधरा वर्षीय मुलीवर शेजाऱ्यानेच केले अत्याचार

आत्महत्या करीन अशी, धमकी देत २५ वर्षीय  विवाहित नराधमाने पंधरा वर्षीय शाळकरी मुलीवर अत्याचार केल्याचे समोर आले.

औरंगाबाद : माझे तुझ्यावर प्रेम आहे, तू माझ्याशी लग्न कर, नाही तर मी आत्महत्या करीन अशी, धमकी देत २५ वर्षीय  विवाहित नराधमाने पंधरा वर्षीय शाळकरी मुलीवर अत्याचार केल्याचे समोर आले. छावणी परिसरात घडलेल्या या प्रकाराची माहिती मिळाल्यांनतर जाब विचारण्यासाठी गेलेल्या पीडितेच्या आईलाही आरोपी व त्याच्या नातलगांनी मारहाण केली. याप्रकरणी छावणी ठाण्यात गुन्हा नोंदविण्यात आला.

सागर श्री सुंदर (वय २५,रा. छावणी परिसर) असे  नराधम आरोपीचे नाव असून पोलिसांनी त्याला अटक केली. याविषयी माहिती देताना पोलिसांनी सांगितले की, छावणी परिसरातील रहिवासी पंधरा वर्षीय मुलगी दहाव्या वर्गात शिकत आहे. तिच्या घराशेजारी सागर राहतो. तो विवाहित असून त्याला एक मुलगी आहे. शाळेत येता-जाता आरोपी तिचा रस्ता अडवून तु खुप सुंदर आहे, माझ्याशी लग्न कर, नाही तर मी आत्महत्या करीन आणि तुझ्या घरच्यांना जेलमध्ये टाकीन अशी धमकी देत. सहा महिन्यापूर्वी त्याने तिला अडविले आणि स्वत:च्या वाहनावरून विविध ठिकाणी फिरवले. त्यानंतर त्याने वेळोवेळी तिला धमकावत तिच्यावर अत्याचार केले. ही बाब आरोपीच्या नातेवाईकांना माहित होती. असे असूनही त्यांनी त्याला पाठिशी घातले. 

गेल्या काही दिवसापासून त्याच्याकडून होणाऱ्या त्रासामुळे पीडितेचे अभ्यासात लक्ष्य लागेना. शिवाय ती सतत घाबरल्यासारखी राहते असे, तिच्या आईच्या लक्षात आले. यामुळे त्यांनी तिला विश्वासात घेऊन विचारपुस केली असता तिने रडतच तिच्यावर होत असलेल्या अत्याचाराची माहिती दिली.  त्यानंतर त्यांनी पीडितेला सोबत घेऊन छावणी पोलीस ठाणे गाठून तक्रार नोंदविली. बाललैगिक अत्याचार प्रतिबंधक  कायद्यांसह आरोपींविरोधात बलात्कार करणे, मारहाण करणे आदी कलमानुसार गुन्हा नोंदविण्यात आला. पोलीस निरीक्षक श्रीपाद परोपकारी यांच्या मार्गदर्शनाखाली उपनिरीक्षक सुरवसे यांनी लगेच आरोपीला अटक केली.