कार-दुचाकी अपघातात एकाचा जागीच मृत्यू; केज तालुक्यातील घटना 

अंबाजोगाई-आडस रस्त्यावर इंडिका कार व दुचाकीची समोरासमोर जोरदार धडक होऊन झालेल्या अपघातात दुचाकीस्वार विष्णू सदाशिव कोटे (वय-५८) यांचा जागीच मृत्यू झाला.

केज (बीड ) : अंबाजोगाई-आडस रस्त्यावर इंडिका कार व दुचाकीची समोरासमोर जोरदार धडक होऊन झालेल्या अपघातात दुचाकीस्वार विष्णू सदाशिव कोटे (वय-५८) यांचा जागीच मृत्यू झाला. हा अपघात आज (दि. १३)दुपारी ३.१५ वाजेच्या सुमारास केंद्रेवाडी शिवारात झाला. 

आडस येथील व्यापारी विष्णू कोटे हे आपल्या दुचाकीवरून  (एमएच४४-एल२३८२) आडसकडे येत होते. ते केंद्रेवाडी शिवारात आले असताना समोरून भरधाव वेगात एक कार ( क्रमांक एमएच २४-एल ००१७) येत होती.कार चालक संतोष सिरसठ याचे वळणावर गाडीवरील ताबा सुटला व त्याने दुचाकीस जोराची धडक दिली. कारचा वेग अधिक असल्याने, दुचाकी कारसोबत तीस फुट अंतरापर्यंत फरफटत गेली. यात दुचाकीस्वार विष्णू कोटे यांचा जागीच मृत्यू झाला. 

कारचालक संतोष सिरसाठ व विशाल खरात हे दोघे (रा. धारूर) जखमी झाले. जखमींवर अंबाजोगाई येथील शासकीय दवाखान्यात उपचार करण्यात येत आहेत.