किन्हाळा-घोडदरा परिसरात वाघाचे दर्शन

१३ जणांचे बळी घेणाºया नरभक्षक वाघिणीची तालुक्यात प्रचंड दहशत असतानाच वन कर्मचाऱ्यांना आता उमरीनजीकच्या किन्हाळा व घोडदरा परिसरात वाघ आढळून आल्यामुळे तालुक्यात पुन्हा दहशतीचे वातावरण निर्माण झाले आहे.

ठळक मुद्देपांढरकवडाचे नागरिक दहशतीत : गस्तीवर वनकर्मचाऱ्यांना दर्शन

लोकमत न्यूज नेटवर्क
पांढरकवडा : १३ जणांचे बळी घेणाºया नरभक्षक वाघिणीची तालुक्यात प्रचंड दहशत असतानाच वन कर्मचाऱ्यांना आता उमरीनजीकच्या किन्हाळा व घोडदरा परिसरात वाघ आढळून आल्यामुळे तालुक्यात पुन्हा दहशतीचे वातावरण निर्माण झाले आहे.
गुरूवारी सायंकाळच्या सुमारास पांढरकवडा वनविभागाचे काही कर्मचारी व वनमजूर येथून १० किलोमीटर अंतरावरील उमरीनजीकच्या किन्हाळा-घोडदरा जंगल परिसरात गस्तीवर असताना त्यांना एका झुडूपात अचानक पट्टेदार वाघ दिसून आला. ही नरभक्षक वाघिण तर नाही ना, अशी शंका या कर्मचाऱ्यांना आली व त्यांनासुद्धा घाम फुटला. परंतु वाघिण नसून वाघ असल्याचे लक्षात आले. त्यांनी तातडीने आपल्या वरिष्ठ अधिकाऱ्यांना याबाबत माहिती दिली. ही वार्ता परिसरात पसरताच उमरी, किन्हाळा, घोडदरा, वाठोडा, मोहदरी, जीरा, मिरा व परिसरात प्रचंड दहशत निर्माण झाली आहे. हा वाघ या जंगलात नेमका आला कुठून, याबाबत वनविभागाच्या कर्मचाऱ्यांमध्ये मतभिन्नता आहे. एक वर्षापूर्वी चक्क रूंझा व वाठोडा या रस्त्यावरच वाघ आढळून आला होता. त्यामुळे परिसरात भितीचे वातावरण निर्माण झाले होेते. वर्दळीचा असलेला हा रस्ता सूनसान झाला होता. आता पुन्हा किन्हाळा-घोडदरा परिसरात वाघ आढळून आला.