जिल्हा परिषदेत सेना सत्तेतून बाहेर

येथील जिल्हा परिषद, पुसद नगर परिषद आणि यवतमाळ पंचायत समितीमध्ये राष्ट्रवादी काँग्रेससोबत असलेली युती तोडून सत्तेतून बाहेर पडत असल्याची घोषणा शिवसेनेचे जिल्हा प्रमुख आमदार संजय राठोड यांनी

राष्ट्रवादीशी काडीमोड: जिल्हा प्रमुखांची माहिती यवतमाळ : येथील जिल्हा परिषद, पुसद नगर परिषद आणि यवतमाळ पंचायत समितीमध्ये राष्ट्रवादी काँग्रेससोबत असलेली युती तोडून सत्तेतून बाहेर पडत असल्याची घोषणा शिवसेनेचे जिल्हा प्रमुख आमदार संजय राठोड यांनी रविवारी येथे पत्रपरिषदेत केली. शिवसेनेचे संपर्क नेते आमदार दिवाकर रावते यांची पत्रपरिषद येथे पार पडली. यावेळी आमदार संजय राठोड यांनी ही घोषणा केली. जिल्हा परिषदेत शिवसेनेने आपल्या बारा सदस्यांचे समर्थन देऊन राष्ट्रवादीची सत्ता स्थापन केली. यातील शिवसेनेच्या दोन सभापतींनी बंड केल्यामुळे त्यांना पक्षातून निष्कासित केल्याचेही आमदार राठोड यांनी यावेळी सांगितले. शिवसेनेचे संपर्क नेते आमदार दिवाकर रावते यांनी विधानसभा निवडणुकीच्या तयारीसाठी जिल्ह्यातील शिवसेना पदाधिकाऱ्यांची बैठक घेतली. त्यानंतर पत्रकारांशी संवाद साधताना आमदार रावते म्हणाले, राज्य शासनाच्या चितळे समितीने तयार केलेला अहवाल सभागृहात सादर करण्यात आला आहे. या अहवालामध्ये स्पष्टपणे अध्यक्ष व सचिव या अपहारास दोषी असल्याचे सांगण्यात आले आहे. मात्र कारवाईचे अधिकार समितीला नसल्याने ते शासनाच्या अखत्यारितील बाब आहे. अशा स्थितीत राज्य शासन तत्कालिन जलसंपदा मंत्र्याला वाचविण्याचा प्रयत्न करत आहे. मात्र ही एक प्रकारे उपमुख्यमंत्री अजित पवार यांच्यासाठी मुख्यमंत्र्यांनी खोदून ठेवलेली कबर आहे. या पूर्वी एटीआरनुसार आदर्श घोटाळ्याच्या अहवालाबात फेरचर्चा करण्यात आली होती. आता तोच धागा पकडून नव्याने गठित होणारे सरकार चितळे समितीच्या अहवालावरही पुन्हा चर्चा करू शकते. तेव्हा यात दोषी असलेल्या मंत्री व सचिवांवर निश्चितच कारवाई करण्यात येईल. शिवाय राज्यातील अनेक प्रकल्पांसाठी केंद्राने पैसा दिला आहे. याची चौकशी केंद्राकडून करण्यात येणार आहे. या बाबतही पाठपुरावा सुरू असल्याचे रावते यांनी सांगितले. पत्रकारांनी स्थानिक पातळीवर शिवसेनेची राष्ट्रवादीशी असलेली युती तोडणार काय, असे विचारताच या बाबत तत्काळ निर्णय घ्या, अशी सूचना दिवाकर रावते यांनी जिल्हा प्रमुख आमदार संजय राठोड यांना केली. जिल्हा परिषदेतील राष्ट्रवादीसोबत असलेली युती तोडली असून पाठिंबा काढत असल्याचे पत्र सोमवारी जिल्हाधिकाऱ्यांना देणार असल्याचेही आमदार संजय राठोड यांनी यावेळी सांगितले. जिल्ह्यात शिवसेनेची जिल्हा परिषद, पुसद नगरपालिका, यवतमाळ पंचायत समिती राष्ट्रवादीशी युती आहे. येथे पदावर असलेले शिवसेनेचे सदस्य लगेच आपल्या पदाचा राजीनामा देतील. राष्ट्रवादी हा भ्रष्टाचारी पक्ष असल्याचा आरोप आमदार संजय राठोड यांनी यावेळी केला. यानंतर पत्रकारांनी दिवाकर रावते यांच्याकडे यवतमाळ शहरातील पाणीपुरवठ्याच्या रखडलेल्या कामाबाबत विचारणा केली. याची माहिती नसल्याचे सांगत रावते यांनी केंद्राच्या योजनेतून हे काम सुरू असेल तर खासदार गवळी यांनी तातडीने पाठपुरावा करावा, अशी सूचना त्यांना द्यावी, असे आमदार राठोड यांना सांगितले. यावेळी माजी आमदार विश्वास नांदेकर, बाळासाहेब मुनगिनवार उपस्थित होते. (कार्यालय प्रतिनिधी)