अपघातात एक ठार, तीन जखमी

कारंजा आणि मंगरुळपीर तालुक्यात तीन अपघात.

वाशिम : कारंजा आणि मंगरुळपीर तालुक्यात रविवार १४ डिसेंबर रोजी वेगवेगळय़ा ठिकाणी घडलेल्या तीन अपघातात २२ वर्षीय युवक ठार, तर तीन जण गंभीर जखमी झाले. यापैकी एकाची प्रकृती गंभीर असून, त्याला उपचारासाठी अकोला येथे हलविण्यात आले आहे. मंगरुळपीर येथील मोहगव्हाण फाट्यनजीक दुचाकी घसरून झालेल्या अपघातात चांभई येथील सतीश पांडुरंग वसू या २२ वर्षीय युवकाचा जागीच मृत्यू झाला. या प्रकरणी मंगरुळपीर पोलिसांत फिर्यादी सुरेश रोकडे यांनी दिलेल्या फिर्यादीत म्हटले, की सतीश पांडुरंग वसू हा रविवारी दुपारी २ वाजताच्या सुमारास एमएच-३७, एन-९९९४ क्रमांकाची मोटारसायकल निष्काळजीपणे आणि भरधाव वेगाने चालवित असताना मोहगव्हाण फाट्यानजीक त्याची मोटारसायकल घसरून झालेल्या अपघातात तो जागीच ठार झाला. या प्रकरणी पोलिसांनी मृतकाविरुद्ध २७९, ३0४ अ, भादंविच्या कलमानुसार गुन्हा दाखल केला आहे. मंगरुळपीर तालुक्यातील शेलूबाजार येथे रविवारीच सकाळी ८.00 वाजताच्या सुमारास घडलेल्या दुसर्‍या एका अपघातात एमएच-४0, वाय १७१२ क्रमांकाच्या ट्रक चालकाने निष्काळजीपणे ट्रक चालवित धडक दिल्यामुळे प्रल्हाद शिंदे हे जखमी झाले. या प्रकरणी मोठी उमरी अकोला येथील रहिवाशी विजय प्रल्हाद शिंदे यांनी दिलेल्या तक्रारीनुसार मंगरुळपीर पोलिसांनी वाडी नागपूर येथील रहिवाशी आरोपी ट्रकचालक विनोद मारोती मंजूळकरविरुद्ध भादंविच्या कलम २७९, ३३७, ३३८, नुसार गुन्हा दाखल केला आहे. कारंजा येथे रविवारी सांयकाळी ५ वाजताच्या सुमारास दुचाकी आणि मारोती आल्टोची धडक झाल्याने घडलेल्या अपघातात दुचाकीवरील दोघे जखमी झाले. यातील एकाची प्रकृती गंभीर असल्याचे समजते.