अखेर हिरकणी कक्षाचे कुलूप उघडले

लोकमत स्टिंग ऑपरेशनचा प्रभाव.

वाशिम : स्तनदा मातांची गैरसोय होऊ नये म्हणून शासनाने प्रत्येक बसस्थानकावर हिरकणी कक्ष सुरू केलेत; मात्र जिल्हय़ा तील बसस्थानकामधील काही हिरकणी कक्ष कुलूपबंद राहत असल्याने व काही कक्षामध्ये जाळे, घाण साचून त्याची स्वच्छ ता होत नसल्याने स्तनदा मातांची गैरसोय होत असल्याचे स्टिंग ऑपरेशन लोकमतने २८ एप्रिल रोजी केले होते. याची दखल घेत जिल्हय़ातील कारंजा, रिसोड व मंगरूळपीर येथील आगारांनी दखल घेऊन स्वच्छता व सुविधा उपलब्ध करून दिल्यात. वाशिम आगाराने मात्र कोणतीही उपाययोजना केल्या नसल्याचे २९ एप्रिल रोजी केलेल्या पाहणीत आढळून आले. हिरकणी कक्षात पंखा, खुर्ची, पिण्याच्या पाण्याची व्यवस्था व स्वच्छतेचा अभाव लोकमतने केलेल्या स्टिंगमध्ये उघडकीस आला होता. आज पुन्हा लोकमत चमूने हिरकणी कक्षाची पाहणी केली असता मंगरूळपीर येथील आगाराने हिरकणी कक्ष स्वच्छ व सुविधा उपलब्ध करून दिल्यात. रिसोड व कारंजा येथील आगारानेसुद्धा हिरकणी कक्षाची स्वच्छता करून स्तनदा मातांना करण्यात येणारे आवाहन फलक दर्शनी भागात लावले. लोकमतने केलेल्या स्टिंग ऑपरेशनमुळे बंद असलेल्या हिरकणी कक्षांचे कुलूप मात्र आज उघडण्यात आलेत.