मीरा भाईंदर बीएसयूपी योजना घोटाळ्याचा तपास काशीमीरा पोलिसांकडून काढून गुन्हे शाखे कडे 

यातील एक आरोपी भाजपा काशीमीरा मंडळचा अध्यक्ष असल्याने तसेच गुन्ह्यातील राजकीय लोकांचे हितसंबंध पाहता हा गुन्हा पहिल्या तपास अधिकाऱ्या कडून काढून घेण्यात आल्याची चर्चा आहे . 

मीरारोड - मीरा भाईंदर महापालिकेच्या बीएसयूपी योजनेत झालेल्या घोटाळ्याचा तपास काशीमीरा पोलिसां कडून काढून तो आता गुन्हे शाखा युनिट १ कडे सोपवण्यात आला आहे . तर यातील एक आरोपी भाजपा काशीमीरा मंडळचा अध्यक्ष असल्याने तसेच गुन्ह्यातील राजकीय लोकांचे हितसंबंध पाहता हा गुन्हा पहिल्या तपास अधिकाऱ्या कडून काढून घेण्यात आल्याची चर्चा आहे . 

काशीमीराच्या जनता नगर आणि काशीचर्च झोपडपट्टीत इमारती उभारून फ्लॅट देण्याच्या बीएसयुपी योजनेत बनावट शिधावाटप पत्रिका, बनावट वीज बिल, करारनामे, बनावट सदनिका वितरणपत्र आदी मार्फत ७ जणांची फसवणूक केल्याचा गुन्हा २२ जून रोजी काशीमीरा पोलिसांनी दाखल केला आहे . 

त्या गुन्ह्यात पोलिसांनी मंगल गांधी (४१)  ;  दयाशंकर यादव (३४)  ; चंद्रप्रकाश चौहान (५४ ) ;  नरसिंग भुरे (३६) ; हरीहरसिंह चौहान (५३) ; अमृतलाल पाल (५०) ह्या ६ आरोपीना आता पर्यंत अटक करण्यात आली होती .  शिधावाटप पत्रिकाधारकांच्या तब्बल ४६२ बोगस नोंदी आढळून आल्या आहेत . 

यातील आरोपी चंद्रप्रकाश चोहान हा भाजपाचा काशीमीरा मंडळ अध्यक्ष आहे . शिवाय भाजपच्या तत्कालीन नगरसेविका मीरादेवी यादव कुटुंबीयांनी ५ सदनिका - दुकाने लाटल्याची तक्रार झाली आहे . त्यातूनच गुन्ह्याचा सुरवाती पासून तपास करणारे पोलीस उपनिरीक्षक अमोल जाधव यांच्या कडे असलेला तपास काढून  तो पोलीस निरीक्षक कुमारगौरव धादवड यांच्याकडे दिला होता . 

मात्र काशीमीरा पोलिसां कडून तपास काढून तो आता गुन्हे शाखा १ चे पोलीस निरीक्षक अविराज कुराडे यांच्या कडे देण्यात आला आहे . तर तपास आर्थिक गुन्हे शाखे कडे देण्याची शक्यता वर्तवली जात होती पण आता तो गुन्हे शाखा १ कडे दिलाय . गुन्हे शाखा कडून तपासाला गती येईल अशी अपेक्षा एकीकडे वर्तवली जात आहे तर राजकीय लोकांचा सहभाग पाहता राजकीय दाबाखाली यात गुंतलेल्याना पाठीशी घातले जाईल अशी शंका सुद्धा व्यक्त होत आहे .  

निरीक्षक कुराडे यांनी सांगितले कि, आपल्या कडे या गुन्ह्या बाबतची कागदपत्रे आलेली असून त्याचे अवलोकन सुरु आहे . तर महापालिका शहर अभियंता दीपक खांबित यांच्या बनावट सह्या करून सदनिका दिल्याची वितरणपत्र सापडली आहेत . त्याप्रकरणी खांबित यांनी पोलिसांना पत्र देऊन गुन्हा दाखल करण्याची मागणी केली असताना पोलिसांनी अजून त्या प्रकरणात गुन्हा दाखल केलेला नाही .