प्रामाणिक रिक्षाचालक व वाहतूक पोलिसांच्या सतर्कतेमुळे प्रवाशाला परत मिळाला महागडा लॅपटॉप 

Vasai News : वसईतील रिक्षाचालक रविंद्र मोहिते व वाहतूक पोलिसांच्या सतर्कतेमुळे ओमनगर भागात राहणारे राजेश केशवानी यांना मोहिते यांच्या रिक्षेत विसरलेला महागडा लॅपटॉप परत करण्यात यश आले आहे.

आशिष राणे

वसई - मागील वर्षी जगभरात हाहाकार माजवलेला कोरोनाचे संकट व संक्रमण दुसऱ्या वर्षी ही कायम आहे. तर आर्थिक विवंचनेत ही केवळ मेहनतीची भाकरी खाणारे आजही आपल्या समाजात सन्मानाने जीवन जगत आहेत. मग तो सामान्य माणूस असो की कर्तव्यावरील पोलीस दादा असो मात्र हाच प्रामाणिकपणा तुम्हाला आत्मिक समाधान देतो हे सुद्धा तितकच सत्य आहे. अशीच एक घटना वसईतील ओमनगर भागात 27 एप्रिल रोजी दुपारी घडल्याचे वसई वाहतूक शाखेचे सहा.उप.पोलीस निरीक्षक तानाजी चौगुले यांनी लोकमतला सांगितले आहे.

वसईतील रिक्षाचालक रविंद्र मोहिते व वाहतूक पोलिसांच्या सतर्कतेमुळे ओमनगर भागात राहणारे राजेश केशवानी यांना मोहिते यांच्या रिक्षेत विसरलेला महागडा लॅपटॉप परत करण्यात यश आले आहे. वसई रोड स्टेशन परिसरात रिक्षाचालक रविंद्र मोहिते हे रिक्षा चालवून प्रामाणिकपणे आपला उदरनिर्वाह करत आहेत. 27 एप्रिल रोजी दुपारी वसई अंबाडी रोड रिक्षा स्टँड येथून राजेश केशवांनी मोहिते यांच्या MH 48 AX 5916 या रिक्षामध्ये बसले व  पाठीमागे आपला लॅपटॉप ठेवून दिला.

रिक्षामध्ये एक दुसरा प्रवाशी ही होता तर यातील दोघेही प्रवाशी हे ओमनगरमध्ये उतरवून मोहिते पुन्हा स्टेशनवर आले असता मोहितेंना रिक्षामध्ये पाठीमागे एका बॅगेत लॅपटॉप दिसला. खरं तर रिक्षामध्ये कोणाचा लॅपटॉप राहिला किंवा त्याचे नाव पत्ता काहीच माहिती नसल्याने मोहिते यांनी वसई वाहतूक शाखेत धाव घेतली. तेथील वाहतूक विभागाचे सउपोनि तानाजी चौगुले व  सउपोनि रविंद्र परब यांना समक्ष भेटून लॅपटॉप जमा केला.

दरम्यान रिक्षाचालक मोहिते यांनी दिलेल्या माहीतीच्या आधारे तात्काळ दोन वाहतूक पोलिसांनी मोहिते यांनी ज्या दोघा प्रवाशांना ओमनगर भागात उतरवले होते तिथे चौकशी केली व काही तासांनी आपलं कौशल्य सिद्ध करीत त्या लॅपटॉप मालकाचे घर गाठलं. संध्याकाळी राजेश केशवानी यांना वाहतूक शाखेत बोलवून पोलिसांनी रिक्षा चालक मोहिते व  केशवानी यांची ओळख पटवली आणि शेवटी तो महागडा लॅपटॉप त्या राजेश केशवानी यांच्या स्वाधीन केला. यावेळी केशवानी यांनी मोहिते व वाहतूक पोलिसांचे आभार मानले.

रिक्षाचालक मोहिते यांच्या प्रामाणिकपणाचे वाहतूक पोलिसांकडून कौतुक करीत त्यांना सन्मानित करण्यात आले. आजही समाजात रिक्षाचालक रविंद्र मोहिते सारखे प्रामाणिक व सतर्कता दाखवणारे पोलीस दादा ही फार कमी आहेत हे जरी सत्य असले तरी पण मोहिते यांनी कोरोना महामारीच्या व लॉकडाऊनमध्ये पण आपला प्रामाणिकपणा व माणुसकी दाखवली याबाबत वसईकर मोहिते सहित त्या दोन वाहतुक पोलिसांचे ही कौतुक करत आहेत.