कुटुंबासह अयोध्येत पोहोचले इलॉन मस्क यांचे वडील, प्रभू श्रीराम यांच्या नावानं दुमदुमलं विमानतळ

विमानतळावर उतरल्यानंतर इरॉल मस्क यांनी माध्यमांसमोर शुद्ध भारतीय शैलीत उपस्थित लोकांचे अभिवादन केले...

अमेरिकन उद्योगपती तथा टेस्लाचे सीईओ इलॉन मस्क यांचे वडील इरॉल मस्क सध्या भारत दौऱ्यावर आहेत. ते बुधवारी दुपारी रामनगरी अयोध्येत पोहोचले. यानंतर ते आपल्या कुटुंबासह रामललांचे दर्शन घेण्यासाठी राम मंदिरात पोहोचले. त्यांचे चार्टर्ड विमान दुपारी २:१५ वाजता महर्षी वाल्मिकी आंतरराष्ट्रीय विमानतळावर उतरले. कडक सुरक्षा व्यवस्थेत त्यांना रामललांच्या दर्शनासाठी नेण्यात आले. अयोध्येत त्यांची एक झलक पाहण्यासाठी भाविकांमध्ये स्पर्धा दिसून आली. 

विमानतळावर उतरल्यानंतर इरॉल मस्क यांनी माध्यमांसमोर शुद्ध भारतीय शैलीत उपस्थित लोकांचे अभिवादन केले. हनुमानगढीचे महंत हेमंत दास यांच्या उपस्थितीत त्यांनी जय श्री राम असा जयघोष केला. विमानतळ जय श्री रामच्या घोषणांनी दुमदुमून गेले होते. यावेळी भारतातील गुंतवणूक योजनेसंदर्भात विचारण्यात आलेल्या प्रश्नावरही त्यांनी सकारात्मक उत्तर दिले. माझा हा दौरा गुंतवणुकीच्या संदर्भातच आहे, असे ते म्हणाले. भारतीय संस्कृतीचे कौतुक करताना, भारतीय संस्कृती आणि परंपरेला एक गौरवशाली इतिहास आहे, मी त्याचा आदर करतो, असेही ते म्हणाले.

यावेली बोलताना तीर्थ क्षेत्र कोषाध्यक्ष महंत श्री गिरी म्हणाले, राम ललांच्या प्राणप्रतिष्ठा कार्यक्रमासाठी देशातील विविध भागातील सेलिब्रिटी पोहोचले होते. याशिवाय, देशांतर्गत आणि परदेशी राजदूत तथा विविध सरकारांमधील प्रभशाली नेतेही पोहोचले होते. आता राजा राम यांची प्रतिष्ठापना होत असताना, जगातील सर्वात श्रीमंत अमेरिकन उद्योगपती इलॉन मस्क यांचे वडील इरॉल मस्क हे देखील बुधवारी अयोध्येत पोहोचले. ही सर्व लक्ष्मीपती विष्णूजींचा अवतार असलेल्या प्रभू श्रीराम यांचीच कृपा आहे.