जेएनपीए चॅनलच्या भ्रष्टाचारात आणखी अधिकारी अडकणार? वाढवण बंदराचे संचालक पदही जाणार?

८०० कोटींच्या झालेल्या गैरव्यवहारप्रकरणी आणखी काही अधिकारीही सीबीआयच्या चौकशीच्या फेऱ्यात अडकण्याची शक्यता आहे.

उरण : जेएनपीएच्या समुद्र चॅनलची खोली वाढवण्याच्या कामात ८०० कोटींच्या झालेल्या गैरव्यवहारप्रकरणी आणखी काही अधिकारीही सीबीआयच्या चौकशीच्या फेऱ्यात अडकण्याची शक्यता आहे. यामुळे काही जेएनपीए अधिकाऱ्यांच्या गोटात खळबळ माजली आहे.

जेएनपीएने समुद्राची खोली वाढवण्याच्या कामासाठी जागतिक बँकेकडून कोट्यवधींचे कर्जही घेतले होते. समुद्राची खोली वाढवण्याच्या कामात कोट्यवधींचा गैरव्यवहार झाल्याची कुणकुण वरिष्ठ अधिकाऱ्यांना आधीच लागली होती. 

याप्रकरणी केंद्र सरकारच्या संबंधित मंत्रालयाकडूनही काही अधिकाऱ्यांची अंतर्गत चौकशी सुरू होती. दरम्यानच्या काळात ठेकेदार कंपनीची शेकडो कोटींची बिले रोखण्यात आली होती. 

जेएनपीएच्या या कृतीविरोधात ठेकेदार कंपन्यांनी उच्च न्यायालयात धाव घेतल्याने हे प्रकरण उघडकीस आले. त्यानंतर सीबीआयने गुन्हा दाखल केल्याचे सूत्रांकडून सांगण्यात येत आहे.

वाढवण बंदराचे संचालक पदही जाणार? 

जेएनपीटीचे तत्कालीन मुख्य अभियंता सुनील कुमार मदभावी हे सेवानिवृत्त झाले आहेत. सेवानिवृत्तीनंतर मदभावी यांना वाढवण बंदराच्या संचालकपदी नियुक्त केले आहे. 

सीबीआयने गुन्हा दाखल केल्यामुळे त्यांना वाढवण बंदराचे संचालक पदही गमवावे लागण्याची शक्यता वर्तविण्यात येत आहे.