बदलापूर : शहरातील पनवेल हायवे या नावाने ओळखल्या जाणाऱ्या परिसरातील सत्यम शीला या गृहसंकुलातील पाणीप्रश्न गंभीर बनला आहे. हा प्रश्न सुटावा, यासाठी या गृहसंकुलातील रहिवाशांनी शुक्रवारी जीवन प्राधिकरणाच्या कार्यालयावर धडक दिली. यावेळी सोसायटीचा पाणीपुरवठा वेळीच सुरू करावा, अशी मागणी यावेळी त्यांनी केली.
सत्यम शीला या गृहसंकुलात २३५ फ्लॅट असून जवळपास एक हजारांपेक्षा जास्त रहिवासी आहेत. मात्र दोन वर्षांपासून या नागरिकांना पाण्यासाठी वणवण भटकावे लागत आहे. यासाठी वेळोवेळी जीवन प्राधिकरणाकडे रहिवाशांनी पाठपुरावा केला आहे. मात्र, त्यांच्या पदरी निराशाच पडली. त्यामुळे शुक्रवारी या रहिवाशांनी पुन्हा जीवन प्राधिकरणावर धडक दिली. जोपर्यंत आम्हाला नाळजोडणी वाढवून मिळणार नाही, तोवर आम्ही तिथेच बसून राहू, असा आक्रमक पवित्रा त्यांनी घेतला होता. जीवन प्राधिकरणाचे अधिकारी राम देगावकर यांनी या रहिवाशांशी संवाद साधत नव्याने तयार होणारा वॉटर ट्रीटमेंट प्लांट झाल्यानंतर लवकरात लवकर जास्त पाण्याची सोय करून देतो असे आश्वासन दिले.
---------