Thane Crime: 'बनावट' सीबीआय अधिकाऱ्याने नोकरीचे आमिष दाखवून घातला गंडा? अधिकारी पोलिसांच्या ताब्यात 

उल्हासनगरात हा संशयित सीबीआय अधिकारी असल्याची बतावणी करत फिरत होता. आपण मोठ्या पदावर असून सीबीआयमध्ये नोकरी लावून देऊ शकतो, असे तो सांगत होता.

उल्हासनगर शहरात स्वतःला सीबीआय अधिकारी असल्याचे भासवून सुशिक्षित तरुण-तरुणींना नोकरीचे आमिष दाखवत लाखो रुपयांना गंडा घालणाऱ्या एका भामट्याला विठ्ठलवाडी पोलिसांनी ताब्यात घेतले आहे. कंबरेला बनावट पिस्तूल आणि सीबीआयचा रुबाब दाखवत वावरणाऱ्या या तोतया अधिकाऱ्याचा भांडाफोड वंचित बहुजन आघाडीच्या पदाधिकाऱ्यांच्या सतर्कतेमुळे झाला आहे.

उल्हासनगरात हा संशयित सीबीआय अधिकारी असल्याची बतावणी करत फिरत होता. आपण मोठ्या पदावर असून सीबीआयमध्ये नोकरी लावून देऊ शकतो, असे आमिष त्याने अनेकांना दाखवले होते. 

या आमिषाला बळी पडून अनेकांनी त्याला लाखो रुपये दिले. विशेष म्हणजे, आपला बनाव खरा वाटावा यासाठी तो कायम सीबीआय अधिकाऱ्यासारखा पेहराव करायचा आणि सोबत बनावट पिस्तूल बाळगायचा. हा बनावट अधिकारी एका राजकीय पदाधिकाऱ्याच्या संपर्कात असल्याची चर्चा परिसरात होती. 

काही फसवणूक झालेल्या व्यक्तींनी 'वंचित बहुजन आघाडी'चे पदाधिकारी सोनू आणि मोनू पवार यांची भेट घेऊन आपली कैफियत मांडली. पवार यांनी या प्रकरणाचा पाठपुरावा केला असता, समोर आलेली व्यक्ती बनावट असल्याचे उघड झाले. 

वंचित बहुजन आघाडीच्या पदाधिकाऱ्यांनी त्या बनावट अधिकाऱ्याला पोलिसांच्या बुधवारी रात्री हवाली केले. विठ्ठलवाडी पोलीस ठाण्याचे वरिष्ठ पोलीस निरीक्षक अशोक कोळी यांनी संशयित व्यक्तीला ताब्यात घेतले आहे. असे सांगितले. 

त्याने लोकांकडून पैसे घेतल्याची कबुली दिली असून ते पैसे लिहून देऊन परत करणार असल्याचे जबाब दिला आहे. मात्र, अद्याप एकही फसवणूक झालेली व्यक्ती अधिकृत तक्रार देण्यासाठी पुढे आलेली नाही.