विश्वास ठेवायचा तरी कुणावर? जवळचेच करताहेत घात!

गेल्या वर्षात महिलांवर अज्ञातांकडून अत्याचाराचे ३, तर अल्पवयीन मुलींसंबंधित नऊ गुन्हे दाखल झाले.

जितेंद्र कालेकर

ठाणे: ओळखीच्या आडून सलगी वाढवत महिलांवर व तरुणींवर लैंगिक अत्याचार करणाऱ्या आरोपींचा धोका दिवसेंदिवस वाढत आहे. ठाणेपोलिस आयुक्तालयाच्या हद्दीत वर्षभरात १,२०४ ओळखीतील किंवा नातेवाईकांनी लैंगिक अत्याचार केल्याचे गुन्हे नोंदविले गेले आहेत. या पीडितांमध्ये २९० अल्पवयीन मुलींचाही समावेश आहे. त्यामुळे अधिक सतर्क राहण्याचे आवाहन पोलिसांनी केले आहे. गेल्या वर्षात महिलांवर अज्ञातांकडून अत्याचाराचे ३, तर अल्पवयीन मुलींसंबंधित नऊ गुन्हे दाखल झाले. विनयभंगाचे ६०, तर अल्पवयीन मुलींच्या विनयभंगासह पोक्सोचे २५ गुन्हे नोंदविले. ओळखीच्या आरोपींकडून बलात्काराचे २१०, तर बलात्कारासह पोक्सोचे २९० गुन्हे नोंद झाले. विनयभंगाचे ४८५, तर विनयभंगासह पोक्सोचे २१९ गुन्हे दाखल झाले आहेत.

मुलींनो, गुड टच, बॅड टच ओळखा

व्यक्त्ती कोणतीही असो, ओळखीची किंवा अनोळखी, त्यांच्याकडून होणाऱ्या गुड आणि बॅड टचबाबतची जनजागृती ठाणे शहर पोलिसांच्या गुन्हे शाखेसह स्थानिक पोलिसांकडून करण्यात येते. गेल्या वर्षभरात शाळा तसेच महाविद्यालयांमध्ये दोन हजारांहून अधिक जनजागृतीपर कार्यक्रम राबविल्याची माहिती ठाणे शहर पोलिसांनी दिली.

लहान मुले-मुली यांच्यावर लैंगिक अत्याचाराचे प्रकार घडू नयेत, यासाठी त्यांना गुड टच आणि बँड टच ओळखण्याची जागृती केली जाते. पोलिसांसह कॉज फाउंडेशन, दिशा फाउंडेशन आदींनी एकत्रित जनजागृती उपक्रम राबवून एक हजार २०७ शाळांमध्ये सेफ्टी ऑडिट केले. महिलांवरील अत्याचाराचे गुन्हे गांभीर्याने घेत आरोपींचा शोध घेऊन त्यांच्यावर कडक कारवाई केली जाते. अमरसिंह जाधव, पोलिस उपायुक्त, गुन्हे अन्वेषण विभाग, ठाणे शहर