Mumbai Train Accident: दिवा-मुंब्रा स्थानकांदम्यान प्रवासी ट्रेनमधून खाली कसे पडले? रेल्वे अधिकाऱ्यांनी सांगितले अपघाताचे कारण

दिवा मुंब्रा स्थानकांदरम्यान सकाळच्या सुमारास घडलेल्या अपघातात आठ प्रवास धावत्या ट्रेनमधून पडले.

Mumbai Local Train Accident: मुंबईकरांची लाईफलाईन असलेल्या मुंबई लोकलमध्ये सकाळीच मोठी अपघाताची घटना घडली. ही घटना दिवा मुंब्रा स्थानकांदरम्यान घडली आहे. दिवा-मुंब्रा स्थानकादरम्यान फास्ट लोकलमधून आठ प्रवासी खाली पडले. त्यातील सहा जणांचा मृत्यू झाल्याचे म्हटलं जात आहे. मृत्यू झालेले प्रवासी हे कसारा आणि सीएसएमटीकडे जाणाऱ्या दोन्ही लोकलमधील होते. ट्रेनमध्ये लटकून प्रवास करत असलेल्या प्रवाशांच्या बॅग खाली पडल्यानंतर बाजूने जाणाऱ्या ट्रेनमधील प्रवासी खाली पडल्याची माहिती रेल्वे प्रशासनाकडून देण्यात आली आहे. गर्दीच्या वेळी हा अपघात घडल्याने प्रवाशांमध्ये भीतीचे वातावरण निर्माण झालं आहे.

सोमवारी सकाळीच मुंबई लोकल ट्रेनमध्ये मोठा अपघात झाला. दिवा-मुंब्रा स्थानकांदरम्यान धावत्या ट्रेनमधून आठ प्रवासी रेल्वे ट्रॅकवर पडले. सीएसएमटीकडे जाणाऱ्या आणि कसाऱ्याकडे जाणाऱ्या लोकल ट्रेनमध्ये हे प्रवासी प्रवास करत होते. मुंब्रा स्टेशनजवळ काही प्रवासी ट्रेनमधून खाली पडले. या घटनेची माहिती मिळताच रेल्वे प्रशासन आणि पोलीस घटनास्थळी पोहोचले. जखमींना तातडीने जवळच्या रुग्णालयात नेण्यात आले. त्यानंतर रेल्वे प्रशासनाने पत्रकार परिषद घेऊन या घटनेची माहिती दिली.

"मुंब्रा ते दिवा लोकल ट्रेनमधून प्रवास करणारे आठ जण खाली पडल्याची घटना घडली आहे. कसाराला जाणाऱ्या लोकल ट्रेनच्या गार्डने ही घटना नोंदवली. या लोकांना उपचारासाठी रुग्णालयात दाखल करण्यात आले आहे. ही घटना डाउन/फास्ट लाईनवरील मुंब्रा-दिवा रेल्वे स्थानकांदरम्यान घडली. कसाराहून येणाऱ्या लोकल ट्रेनमध्ये फूटबोर्डवरून प्रवास करणारे लोक आणि त्याचप्रमाणे सीएसएमटीकडे जाणाऱ्या ट्रेनमध्ये प्रवास करणारे लोक खाली पडले आणि अपघात झाला. आठ प्रवासी खाली पडले होते. हा अपघात साडेनऊ वाजता घडला. त्यानंतर ९.५० पर्यंत या प्रवाशांना रुग्णावाहिका आणून रुग्णालयात नेण्यात आले," अशी माहिती रेल्वेचे जनसंपर्क अधिकारी स्वप्निल नीला यांनी दिली. 

#WATCH | On Mumbra railway mishap, CPRO, Central Railway, Swapnil Dhanraj Nila says, "There has been an incident where eight people travelling on local trains from Mumbra to Diva fell down. The guard of a Kasara-bound local train reported this incident. These people have been… pic.twitter.com/IjHcQaPySJ

— ANI (@ANI) June 9, 2025

"दोन्ही गाड्या या लोकल ट्रेन होत्या. त्यामध्ये ही अपघाताची घटना घडली आहे. दोन्ही लोकल एकमेकांपासून विरुद्ध दिशेने प्रवास करत होत्या. एक लोकल सीएसएमटीकडे तर दुसरी लोकल कसाऱ्याकडे जात होती. या दोन लोकलमधील प्रवासी खाली पडले. हे सर्व प्रवासी फुटबोर्डवरून प्रवास करत होते. जखमीपैकी एका प्रवाशाने सांगितले की तो फुटबोर्डवरून प्रवास करत होता. त्याच्यामागे त्याची बॅग होती आणि ती अडकल्यानंतर ही घटना घडल्याचे त्यांने सांगितले," असेही स्वप्निल नीला म्हणाले.