Corona Vaccine: Queues of citizens for vaccination in Ulhasnagar, harassment of citizens | Corona Vaccine : उल्हासनगरात लसीकरणासाठी नागरिकांच्या रांगा, नागरिक हैराण

Corona Vaccine : उल्हासनगरात लसीकरणासाठी नागरिकांच्या रांगा, नागरिक हैराण

- सदानंद नाईक 

उल्हासनगर : महापालिका आरोग्य विभागाच्या भोंगळ कारभारामुळे कॅम्प नं-५, शाळा क्रं-२८ मधील कोरोना लसीकरण केंद्रावर लस घेण्यासाठी नागरिकांची गर्दी उसळून लांबच लांब रांगा लागत आहेत. ऑनलाईन व टोकन पद्धतीने लसीकरण सुरू असल्याची माहिती आरोग्य कर्मचाऱ्यांनी दिली. (Corona Vaccine: Queues of citizens for vaccination in Ulhasnagar, harassment of citizens)

उल्हासनगरात कोरोनाचा प्रादुर्भाव रोखण्यासाठी महापालिका आयुक्त डॉ. राजा दयानिधी, अतिरिक्त आयुक्त करुणा जुईकर, उपायुक्त अशोक नाईकवाडे, उपायुक्त मदन सोंडे, वैधकीय अधिकारी डॉ. दिलीप पगारे, डॉ. राजा रिजवानी विविध उपक्रम राबवित आहेत. लसीकरण मोठ्या प्रमाणात होण्यासाठी महापालिकेच्यावतीने आयटीआय कॉलेज इमारत व कॅम्प नं-५ येथील शाळा क्रं-२८ मध्ये कोरोना लसीकरण केंद्र सुरू केले. दररोज ४०० पेक्षा जास्त जणांचे लसीकरण या केंद्रात होत असल्याची माहिती डॉ. रिजवानी यांनी दिली. 

काही खाजगी हॉस्पिटलला लसीकरण करण्यास महापालिकेने परवानगी दिली. मात्र त्यातील लसीकरणाची संख्या अत्यंत कमी आहे. तर मध्यवर्ती रुग्णालयात लसीकरण सुरू असून रुग्णालयाला राज्य शासनाकडून लसीचा साठा देण्यात येतो. लसीकरण जास्तीत जास्त होण्यासाठी केंद्र वाढविण्याचे संकेत महापालिका आरोग्य विभागाने दिले.  शहर पूर्वेला शाळा क्रं-२८ मध्ये एकमेव लसीकरण केंद्र असल्याने, नागरिक येथे मोठ्या प्रमाणात गर्दी करत असल्याचे चित्र आहे.

ऑनलाईन व ऑफलाईन दोन्ही प्रकारातून लसीकरण सुरू असून नागरिक सकाळी ६ वाजल्या पासून केंद्रावर रांगा लावत आहेत. नागरिकांच्या गर्दीमुळे कोरोना संसर्ग होण्याची शक्यता व्यक्त होत आहे. केंद्रावर नागरिकांना बसण्याची व पिण्याच्या पाणीची कोणतीही सुविधा नसून पेरासिटॉमॉल गोळ्या दिल्या जात नाही. तसेच लसीकरण केंद्रावर येणाऱ्या नागरिकांना लसीबाबत प्राथमिक माहिती दिली जात नसल्याने, बहुतांश नागरिक लसी बाबत अनभिज्ञ असल्याचे दिसते. नागरिकांची गैरसोय होऊ नये म्हणून लसीकरण केंद्राची संख्या वाढविण्याची मागणी सर्वस्तरातून होत आहे. 

लसीकरण केंद्र नव्हेतर संसर्ग केंद्र?
महापालिका लसीकरण केंद्रावरील नागरिकांची गर्दी बघता, हे लसीकरण केंद्र नव्हेतर, कोरोना संसर्ग केंद्र असल्याची टीका मनसे कडून होत आहे. जास्तीत जास्त नागरिकांना लसीकरणाचा लाभ मिळण्यासाठी लसीकरण केंद्र प्रत्येक कॅम्प मध्ये सुरू करण्याची मागणी मनसेचे शहराध्यक्ष बंडू देशमुख यांनी केली.

Web Title: Corona Vaccine: Queues of citizens for vaccination in Ulhasnagar, harassment of citizens

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.