नितिन पंडीत-
भिवंडी ( दि. ११ ) - दोन महिन्यापासून बेपत्ता असलेल्या आईसह तीन मुलांचे मृतदेह झाडाला सडलेल्या अवस्थेत लटकलेले आढळून आल्याची घटना भिवंडीतील पडघा पोलीस ठाण्याच्या हद्दीत असलेल्या उबंरखांड पाच्छापूर जंगलात घडली आहे. दोन महिन्या नंतर गुरुवारी हि घटना समोर आल्याने या घटनेने परिसरात भीतीचे वातावरण पसरले असून पत्नी आणि तिन्ही मुलांचे मृतदेह पाहून वडिलांनी देखील विष प्राशन करून आत्महत्येचा प्रयत्न केला आहे. त्यांची प्रकृती चिंताजनक असून त्यांच्यावर मुंबईच्या जे जे रुग्णालयात उपचार सुरु आहेेत. विशेष म्हणजे काही दिवसापूर्वीच पाडघ्याच्या पुढे असलेल्या शहापूर तालुक्यातील खर्डी नजीकच्या जंगलात अशाच प्रकारे तिघांचे मृतदेह आढळून आले होते. मात्र पोलीस तपासाअंती या तिघांनी तंत्रमंत्र विद्या शिकण्यासाठी व अमर होण्यासाठी आत्महत्या केल्याचे समोर आले होते. आता अश्याच प्रकारे झाडाला सडलेल्या व लटकलेल्या अवस्थेत हे चारही माय - लेकांचे मृतदेह आढळून आल्याने याप्रकरणी पडघा पोलीस सखोल तपास करीत आहत.
श्रीपत बच्चू बांगारे असे आत्महत्या करण्याचा प्रयत्न करणाऱ्या इसमाचे नाव आहे. तर त्याची मयत पत्नी रंजना (वय ३०) , मयत मुलगी दर्शना (वय, १२), रोहिणी (वय ६) आणि मुलगा रोहित (वय ९) असे झाडाला लटकलेल्या अवस्थेत मृतदेह आढळून आलेल्या चौघांची नावे आहेत. मात्र संशयास्पद आणि भयंकर अश्या घटनेच्या तपासाचे पडघा पोलिसांसमोर आव्हान उभे ठाकले आहे. भिवंडी तालुक्यातील उंबरखांड गावातील श्रीपत यांनी २१ ऑक्टोंबरला चौघेही माय - लेक बेपत्ता झाल्याची तक्रार पडघा पोलीस ठाण्यात दाखल केली होती. मात्र गुरुवारी दुपारच्या सुमारास श्रीपतचा भाऊ जंगलात लाकडे आणण्यासाठी गेला असता, त्याला एका झाडावरून दुर्गन्धी येत होती. त्यामुळे त्याने पहिले असता झाडाला सडलेल्या अवस्थेत चारही मृतदेह आढळून आले. या मृतदेहाच्या अंगावरील कपड्या मूळे त्यांची ओळख पटल्याने घटनेची माहिती भावाने श्रीपतला दिली. त्यांनतर पत्नी आणि ३ मुलांच्या मृत्यूंची बातमी मिळताच श्रीपतने स्वतः देखील विष प्राशन करून आत्महत्येचा प्रयत्न केला. सध्या त्याच्यावर जेजे रुग्णालयात उपचार सुरु आहेत.
दरम्यान घटनेची माहिती मिळताच ठाणे ग्रामीण विभागीय पोलीस अधिकाऱ्यांसह पडघा पोलीस ठाण्याचे पथक घटनास्थळी दाखल होऊन पंचनामा केला असून फॉंरेन्सिक पथकही घटनास्थळी आले होते. मात्र दोन महिन्यापासून चौघांचे मृतदेहाचे सांगाडे झाडाला लटकलेल्या अवस्थेत आढळून आल्याने परिसरात भीतीचे वातावरण पसरले असून पडघा पोलीस सखोल तपास करीत आहेत.