कसारा घाटात बससह ३ वाहनांचा अपघात, ५ जण जखमी

रविवारी संध्याकाळी साडेपाचच्या सुमारास कसारा घाटात एका काळी पिवळी इको गाडीस ट्रकने धडक दिल्यामुळे अपघात झाला.

कसारा  : आज संध्याकाळी साडेपाचच्या सुमारास नाशिक-मुंबई लेनवरील नवीन कसारा घाटात बससह अन्य ३ गाड्यांच्या आपघात होऊन झालेल्या अपघातात ५ जण जखमी झाले आहेत.

मिळालेल्या माहितीनुसार, रविवारी संध्याकाळी साडेपाचच्या सुमारास कसारा घाटात एका काळी पिवळी इको गाडीस ट्रकने धडक दिल्यामुळे अपघात झाला. या अपघातातील प्रवासी उतरून सुरक्षित ठिकाणी पोहचत असतानाच ट्रकला मागून शिवशाही बसने ठोकले व बसच्या मागे असलेला ट्रेलर ट्रक बसवर जाऊन धडकला. या विचित्र अपघातात इकोसह बसचे मोठे नुकसान झाले असून बसला पुढून व मागून धडक बसल्याने शिवशाही बसने पेट घेतला. परंतु प्रसंगावधान राखत बसमधील प्रवासी सुखरुप खाली उतरले. 

या अपघाताची माहिती मिळताच काही मिनिटातच आपत्ती व्यवस्थापन टीमचे अधिकारी शाम धुमाळ, दत्ता वाताडे, शरद काळे, देवा वाघ यांनी घटनास्थळी जाऊन मदतकार्य केले. बस चालकाच्या मदतीने आग तात्काळ विझवण्यात यश आले. दरम्यान दोन प्रवाशांना गंभीर दुखपत झाल्याने त्यांना इगतपुरी ग्रामीण रुग्णाल्यात दाखल करण्यात आले.