मस्क-ट्रम्प वादात स्टारलिंकसाठी मोठी बातमी! भारताने लायसन्स दिले...

मस्क-ट्रम्प वादात मस्क यांच्या कंपन्यांना मोठे नुकसान झाले आहे. हा वाद आता पराकोटीला गेला असून तो कोणते टोक गाठतो याकडे जगाचे लक्ष लागले आहे.

एकीकडे एलन मस्क आणि अमेरिकेचे राष्ट्राध्यक्ष डोनाल्ड ट्रम्प यांच्यात जोरदाक वाद सुरु असताना दुसरीकडे भारतात मस्क यांच्या सॅटेलाईट इंटरनेट स्टारलिंकला लायसन्स मिळाले आहे. 

मस्क-ट्रम्प वादात मस्क यांच्या कंपन्यांना मोठे नुकसान झाले आहे. हा वाद आता पराकोटीला गेला असून तो कोणते टोक गाठतो याकडे जगाचे लक्ष लागले आहे. दोघेही एकसारख्याच स्वभावाचे आहेत, यामुळे माघार घेण्याची शक्यता फारच कमी आहे. गेल्या काही वर्षांपासून मस्क यांना भारतात स्टारलिंकची सेवा सुरु करायची होती. परंतू, त्यांना लायसन्स मिळत नव्हते. ते आज मिळाले आहे. 

रॉयटर्सनुसार भारतीय टेलिकॉम मिनिस्ट्रीकडून मस्क यांच्या कंपनीला महत्वाचे लायसन मिळाले आहे. यापूर्वी जिओ आणि वन वेबला सॅटेलाईट इंटरनेट पुरविण्याचे लायसन्स मिळाले होते. आता असे लायसन्स मिळविणारी मस्क यांची ही तिसरी कंपनी ठरली आहे. केंद्रीय मंत्री ज्योतिरादित्य शिंदे यांनी नुकतेच संकेत दिले होते.  दुर्गम भागात आपण वायर टाकू शकत नाही किंवा टॉवर बसवू शकत नाही, यामुळे उपग्रह कनेक्टिव्हिटी खूप महत्वाची आहे, असे शिंदे यांनी म्हटले होते. 

स्टारलिंक काय आहे...

स्टारलिंक ही एक सॅटेलाईट इंटरनेट सेवा आहे, जी लो अर्थ ऑर्बिटमध्ये फिरणाऱ्या उपग्रहांद्वारे काम करते. रिलायन्स जिओ (Reliance Jio) आणि एअरटेल (Airtel) यांसारख्या कंपन्यांनी स्टारलिंकसोबत भागीदारी केली आहे. स्टारलिंक लवकरच भारतात सॅटेलाईट इंटरनेट सेवा सुरू करू शकते. यामुळे ग्रामीण आणि दुर्गम भागांमध्ये हायस्पीड इंटरनेट उपलब्ध होईल. परंतू त्याचा दर खूप जास्त असेल. स्टारलिंक इंटरनेटची सेवा पुरवण्यासाठी, लो अर्थ ऑर्बिटमध्ये (LEO) उपग्रह असतो जो जमिनीवरील रिसीव्हरशी कनेक्ट असतो. त्याद्वारे इंटरनेट पुरविले जाते.