एसटीच्या विधी सल्लागारास लाच घेताना अटक

कामगार न्यायालय आवारात झाली कारवाई

सोलापूर : बडतर्फीच्या खटल्यात बाजूने निकाल लावण्यासाठी वाहकाकडून चार हजारांची लाच घेताना राज्य परिवहन महामंडळाचे कायदेशीर सल्लागार दिलीप पंढरीनाथ मराठे यांना लाचलुचपत प्रतिबंधक खात्याच्या पोलिसांनी गुरुवारी दुपारी कामगार न्यायालयाच्या आवारात रंगेहाथ पकडले. पंढरपूर आगारातील वाहक समाधान पांढरे यांच्यावर अपहाराचा ठपका ठेवण्यात आला होता. त्यावरून चौकशी होऊन राज्य परिवहन महामंडळाने त्यांना १२ सप्टेंबर २०१३ रोजी बडतर्फीची नोटीस दिली होती. या कारवाईविरुद्ध पांढरे यांनी कामगार न्यायालयात अपील दाखल केले होते. न्यायालयाने याची दखल घेत राज्य परिवहन महामंडळास ‘जैसे थे’ स्थिती ठेवण्याचा आदेश दिला होता. त्यामुळे ते कामावर हजर होते. सुनावणी लांबविण्यासाठी परिवहनचे विधी सल्लागार मराठे यांनी पांढरे यांना लाच मागितली. तडजोडीने चार हजार देण्याचे ठरले. याबाबत पांढरे यांनी लाचलुचपत प्रतिबंधक खात्याशी संपर्क साधून तक्रार दाखल केली. आज सुनावणीची तारीख होती. याकामी दोघेही कामगार न्यायालयात आले होते. पोलिसांनी विधिज्ञ कक्षाजवळ सापळा लावला. दुपारी पांढरे यांच्याकडून लाच स्वीकारल्यावर पोलिसांनी अ‍ॅड. मराठे यांना रंगेहाथ पकडले. त्यांना अटक करून जेलरोड पोलीस ठाण्यात गुन्हा दाखल करण्यात आला आहे. शासकीय कामासाठी कोणी लाच मागत असेल तर ९४०४६६३६९७ किंवा २३१२६६८ या क्रमांकावर संपर्क साधण्याचे आवाहन पोलिसांनी केले आहे.