बार्शीजवळ एसटीचा अपघात; दुचाकीवरील तीन जण जागीच ठार, बसमधील प्रवासी जखमी

हा अपघात बार्शी - धाराशिव  रोडवरील तांदुळवाडी गावाजवळ झाला आहे.

सोलापूर : सोलापूर जिल्ह्यातील बार्शीजवळ दुचाकी व एसटी बसचा अपघात झाला. या अपघातात तीन ठार तर अन्य एसटी बसमधील १० ते १५ प्रवासी जखमी झाल्याची प्राथमिक माहिती पोलिसांनी माध्यमांना दिली आहे. हा अपघात बार्शी - धाराशिव  रोडवरील तांदुळवाडी गावाजवळ झाला आहे.

दरम्यान, दुपारी साडेतीन वाजण्याच्या सुमारास एमएच ४० एएन ९७५६ ही राज्य परिवहन महामंडळाची बस पुण्याहून धाराशिवला जात होती. दुपारी तीनच्या सुमारास बार्शी स्थानकातून ही बस धाराशिवकडे निघाली. तांदुळवाडी गावाजवळ समोरून येणारी दुचाकी भरधाव वेगात येत थेट एसटी बसला धडकली. या अपघातात दुचाकीवरील तिघे जागीच ठार झाले असून अन्य प्रवासी किरकोळ जखमी झाले आहेत. या अपघातात दोघांचे प्रेत व दुचाकी ही एसटी बसच्या खाली अडकले असून क्रेनव्दारे दोघांचे प्रेत काढण्याचे काम सुरू आहे. अपघाताची माहिती बार्शी पोलिस ठाण्याचे वरिष्ठ पोलिस अधिकारी घटनास्थळी दाखल झाले असून जखमींना उपचारासाठी शासकीय रूग्णालयात पाठविण्यात येत आहे. अपघातस्थळी बघ्यांची मोठी गर्दी झाली आहे. हा अपघात इतका विचित्र होता की, बघणारे लोक हळहळ होत होते.