सोलापूर : महापौरपदाच्या निवडणुकीत एमआयएमच्या आठ नगरसेवकांनी तटस्थ राहावे, असे आदेश एमआयएमचे जिल्हा निरीक्षक अन्वर सादत यांनी मंगळवारी रात्री दिले. यामुळे महाआघाडीच्या गोटात खळबळ उडाली. भाजपच्या उमेदवार श्रीकांचना यन्नम यांचा विजयाचा मार्ग सुकर झाल्याचे यातून स्पष्ट झाले. उपमहापौरपदाच्या उमेदवारीवरुन भाजपमध्ये निर्माण झालेला तिढा मंगळवारी कायम होता. त्यामुळे या निवडीकडे लक्ष असेल.
महापौर आणि उपमहापौर पदासाठी बुधवारी सकाळी ११.३० वाजता निवडणूक होत आहे. निवडणूक निर्णय अधिकारी म्हणून जिल्हा परिषदेचे मुख्य कार्यकारी प्रकाश वायचळ काम पाहतील. महापौरपदासाठी चार सदस्यांनी अर्ज दाखल केले आहेत. भाजपकडून श्रीकांचना यन्नम तर महाविकास आघाडीने शिवसेनेच्या सारिका पिसे यांची उमेदवारी निश्चित केली आहे. १०२ सदस्य असलेल्या महापालिकेत भाजपकडे सर्वाधिक ४९ सदस्य आहेत. भाजपनंतर शिवसेना २१, काँग्रेस १४, एमआयएम ९, राष्ट्रवादी ४ वंचित बहुजन आघाडी ३, बसपा १, माकप १ असे पक्षीय बलाबल आहे. काँग्रेस आणि एमआयएमचे दोन नगरसेवक तांत्रिक कारणांमुळे बुधवारी उपस्थित नसतील. १०० सदस्य उपस्थित राहिल्यास बहुमतासाठी ५१ सदस्यांची आवश्यकता असेल. भाजपला केवळ दोन सदस्यांची आवश्यकता आहे.
काँग्रेस, शिवसेना, राष्ट्रवादी, वंचित बहुजन आघाडीने महाआघाडी केली. या महाआघाडीकडे बहुमत असल्याचा दावा करण्यात आला. काँग्रेसच्या नेत्यांनी एमआयएमला सोबत घेतल्याचे सांगितले. परंतु, एमआयएमने तटस्थ राहण्याचे धोरण स्वीकारल्याने महाआघाडीची अडचण झाली. भाजपच्या गोटात आनंद झाला. श्रीकांचना यन्नम यांचा विजयाचा मार्ग सुकर दिसू लागला.
बैठक सुरू असताना हैदराबादेतून आला निरोप - महाआघाडीसोबत जायचे की नाही, यावर चर्चा करण्यासाठी एमआयएमचे गटनेते रियाज खरादी यांच्या उपस्थितीत नगरसेवकांची मंगळवारी रात्री होटगी रोडवरील एका हॉटेलमध्ये बैठक झाली. यादरम्यान, एमआयएमचे जिल्हा निरीक्षक अन्वर सादत यांनी हैदराबाद येथून व्हिडीओ क्लीप पाठवून नगरसेवकांना तटस्थ राहण्याचे आदेश दिले. प्रमुख खासदार असदुद्दीन ओवेसी यांचा हा आदेश असल्याचे बजावले. एमआयएमचे सर्व नगरसेवक या आदेशाचे पालन करतील, असे खरादी यांनी जाहीर केले.
आम्ही बंडखोरी करणारच : वल्याळ-उपमहापौरपदासाठी नऊ जणांनी अर्ज दाखल केले आहेत. यात भाजपकडून राजेश काळे, नागेश वल्याळ, शिवसेनेचे अमोल शिंदे, भारतसिंग बडूरवाले, काँग्रेसच्या फिरदोस पटेल, नरसिंग कोळी, एमआयएमच्या तस्लीम शेख, शाहजिदाबानो शेख यांचा समावेश आहे. काळे यांची निवड निश्चित मानली जात असली तरी नागेश वल्याळ बंडखोरीवर ठाम आहेत. वल्याळ यांच्यासोबत भाजपचे सात नगरसेवक आहेत. सात जणांनी वेगळी भूमिका घेतल्यास महाआघाडीचा उमेदवार विजयी होऊ शकतो.
वाल्याळ म्हणाले, आम्ही सात नगरसेवकांनी सकाळी माजी मंत्री सुभाष देशमुख यांच्याशी चर्चा केली. या बैठकीत देशमुख यांनी माजी मंत्री विजयकुमार देशमुख यांच्याशी फोनवरुन चर्चा केली. या चर्चेनंतर राजेश काळे यांना माघार घ्यायला लावतो, असे सुभाष देशमुख म्हणाले. पुन्हा दुपारी भाजपचे जिल्हाध्यक्ष शहाजी पवार यांचा फोन आला. त्यांच्यासोबत बैठक झाली. काळे यांना पक्षाने अधिकृत उमेदवारी दिली आहे. त्यांना माघार घ्यायला लावणे चुकीचे होईल, असे सांगितले. आम्ही माघार घेणार नाही. पक्षानेच निर्णय घ्यावा, असे सांगून आम्ही उठून आलो.