अकलूज : येथील शिवापुर पेठेत सामान खरेदीसाठी आलेल्या ग्राहकाच्या बुलेट दुचाकीने उष्णतेने पेट घेतल्याने पेठेत नागरिकांची धावपळ झाली असून नागरिकांनी सावधता बाळगत पाण्याने आग विझविल्यामुळे अनर्थ टळला.
दरम्यान, शुक्रवार २९ रोजी २ वाजण्याच्या सुमारास अकलूज शहरातील शिवापुर पेठेत खरेदीच्या निमित्ताने एक ग्राहक बुलेट या दुचाकीवरुन आला होता. त्याने केशवचंद रतुचंद फडे यांच्या बंद असलेल्या किराणा दुकानासमोर मोटारसायकल लावून खरेदीसाठी बाजारपेठेत गेला असताना उष्णतेने वायर जळाल्याने बुलेट गाडीने पेट घेतला. बघता बघता आगीने रौद्र रुप धारण केल्याने नागरिकांत गोंधळ उडाला, परंतु सर्वानी सावधानता बाळगून बुलेट गाडीवर पाणी टाकत आग अटोक्यात आणली.या बुलेट शेजारीच तीन ते चार मोटारसायकली होत्या.नागरींकांनी तत्पर आग अटोक्यात आणल्यामुळे पुढील अनर्थ टळला. आग आटोक्यात आणल्यावर बुलेटच्या मालकाने मोटारसायकल टमटम मधे घालुन घेऊन गेला. सदर बुलेट गाडीला नंबर नव्हता. गडबड गोंधळात नागरिकांना मोटारसायकल मालकाचे नाव विचारता आले नाही. यासंदर्भात अकलुज पोलीस ठाण्यात संपर्क केला असता पोलीसांनी याबाबत कोणती ही खबर आली नसल्याचे सांगितले.