Video: व्हिडिओमध्ये दिसला अणुबॉम्बचा विध्वंस; काही सेकंदांत संपूर्ण शहर उद्ध्वस्त...

Viral Video: पाहा थरकाप उडवणारा व्हिडिओ

Shocking Video Viral: अमेरिका-इस्रायल आणि इराणमधील संघर्षाच्या पार्श्वभूमीवर अणुबॉम्बची चर्चा सुरू झाली आहे. अशातच, अणुबॉम्ब किती घातक असतो, यामुळे किती विध्वंस होऊ शकतो, हे सांगणारा एक व्हिडिओ सध्या सोशल मीडियावर वेगाने व्हायरल होत आहे. आर्टिफिशियल इंटेलिजन्स (AI) च्या मदतीने बनवलेला व्हिडिओ पाहून तुमचाही थरकाप उडाल्याशिवाय राहणार नाही.

व्हिडिओमध्ये काय दाखवले आहे?

इंस्टाग्रामवर @insidehistory या अकाउंटवर शेअर करण्यात आलेल्या या व्हिडिओमध्ये आर्टिफिशियल इंटेलिजन्स (AI) च्या मदतीने अणुबॉम्बचा संभाव्य विनाश कसा असू शकतो याचे दृश्य दाखवण्यात आले आहे. व्हिडिओमध्ये सुरुवातीला एक शांत आणि लोकवस्तीने भरलेले शहर दिसते. अचानक त्या शहरावर अणुबॉम्ब टाकला जातो. त्यानंतर सूर्यापेक्षाही प्रखर अशी प्रकाशाची चमक दिसते आणि काही क्षणांत शहर पूर्णपणे उद्ध्वस्त होताना दिसते. 

अणुबॉम्बमुळे निर्माण झालेली प्रचंड उष्णता इतकी भयानक असते की, मोठमोठ्या इमारती, झाडे, पर्वत आणि नद्या क्षणार्धात नष्ट होतात. हा विनाश इतक्या वेगाने होतो की लोकांना सावरण्याची संधीही मिळत नाही. हा व्हिडिओ आतापर्यंत 22 लाखांहून अधिक लोकांनी पाहिला असून कमेंट सेक्शनमध्ये अनेकांनी चिंता व्यक्त केली आहे. एका यूजरने लिहिले, जगातील सध्याची परिस्थिती पाहता हा व्हिडिओ कधी वास्तवात बदलू नये, अशी भीती वाटते.

तर दुसऱ्या एका यूजरने उपरोधिक प्रतिक्रिया देत म्हटले, इतका मोठा विध्वंस झाला तरी माझा बॉस विचारेल, ऑफिसला कधी पोहोचणार? आणखी एका यूजरने टिप्पणी केली की, सत्तेसाठी चाललेल्या संघर्षात सामान्य माणूसच भरडला जातो. मोठ्या नेत्यांनी स्वतःच लढून निर्णय घ्यावा.

अणुबॉम्बची विध्वंसक ताकद

वैज्ञानिकांच्या मते अणुबॉम्बचा स्फोट कल्पनेपलीकडचा विनाश घडवू शकतो. स्फोटाच्या वेळी निर्माण होणाऱ्या अग्नीचे तापमान सूर्यापेक्षाही जास्त असू शकते. त्यामुळे स्फोटाच्या अनेक किलोमीटर परिसरातील वस्तू क्षणात वाफ होऊन नष्ट होऊ शकतात. स्फोटानंतर निर्माण होणाऱ्या प्रचंड धक्क्याच्या लाटा मजबूत इमारतीदेखील सहज पाडू शकतात.

इतिहासाने दिलेला धडा

अणुबॉम्बच्या स्फोटातून वाचलेले लोकही सुरक्षित राहत नाहीत. त्यांना धोकादायक रेडिएशन आणि रेडिओधर्मी धुळीचा सामना करावा लागतो. यामुळे अनेक पिढ्यांपर्यंत गंभीर आजार पसरू शकतात आणि जमीन तसेच पाणीही प्रदूषित होऊ शकते. द्वितीय महायुद्धाच्या काळात जपानमधील हिरोशिमा आणि नागासाकी येथे झालेल्या अणुबॉम्ब हल्ल्यांची भीषणता आजही जगाला अण्वस्त्रांच्या धोक्याची आठवण करून देते.