Viral : नोकरीसाठी सीव्ही पाठवला, अवघ्या ६ मिनिटांतच थेट नकार आला! कारण ऐकून तुम्हीही विचारात पडाल
By ऑनलाइन लोकमत | Updated: November 30, 2025 13:20 IST2025-11-30T13:19:36+5:302025-11-30T13:20:00+5:30
एका डेव्हलपरने रिक्रूटरला सीव्ही पाठवल्यानंतर अवघ्या सहा मिनिटांत त्याला नकार कळवणारा ईमेल आला.
Viral : नोकरीसाठी सीव्ही पाठवला, अवघ्या ६ मिनिटांतच थेट नकार आला! कारण ऐकून तुम्हीही विचारात पडाल
नोकरीसाठी अर्ज केल्यानंतर उत्तराची वाट पाहत आठवडे किंवा महिने घालवावे लागणे, हा अनुभव अनेकांनी घेतला असेल. पण, कोलकाता येथील एका डेव्हलपरच्या बाबतीत याच्या अगदी उलट घटना घडली आहे. त्याने आपला सीव्ही पाठवल्यानंतर अवघ्या सहा मिनिटांत त्याला नकार कळवणारा ईमेल आला. या सर्वात जलद रिजेक्शनमुळे दुःखी होण्याऐवजी, त्याने रिक्रूटरच्या प्रामाणिकपणाचे कौतुक केले आहे. त्याची ही पोस्ट सध्या सोशल मीडियावर तुफान व्हायरल होत आहे आणि हायअरिंग प्रक्रियेतील पारदर्शकतेवर मोठी चर्चा सुरू झाली आहे.
रात्री ११.४७ ला सीव्ही, ११.५३ ला रिजेक्शन!
कोलकाता येथील कृष्णव कनोई नावाच्या या डेव्हलपरने एक्स या सोशल मीडिया प्लॅटफॉर्मवर आपली पोस्ट शेअर केली आहे. त्याने दिलेल्या माहितीनुसार, त्याने एका हायरिंग कॉन्टॅक्टला रात्री ११ वाजून ४७ मिनिटांनी आपला रिझ्युमे ईमेल केला. आश्चर्याची गोष्ट म्हणजे, अवघ्या सहा मिनिटांत, म्हणजेच रात्री ११ वाजून ५३ मिनिटांनी त्याला लगेच उत्तर आले. रिक्रूटरने अत्यंत विनम्र भाषेत आणि थेट उत्तर दिले, "आम्ही सध्या अधिक अनुभवी डेव्हलपरच्या शोधात आहोत. तुम्ही करत असलेले उत्तम काम सुरू ठेवा. शुभेच्छा!"
Fastest rejection ever , although saved a lot of time for me , why can’t we normalise this ? pic.twitter.com/0k7znuo9te
— Krishnav Kanoi (@KanoiKrishnav) November 27, 2025
'फालतू फॉलो-अप' करण्याची वेळ वाचली
सामान्यतः, नोकरीसाठी अर्ज नाकारल्यानंतर लोक नाराज होतात. मात्र, कृष्णव कनोई याने या रिजेक्शनकडे सकारात्मक दृष्टीने पाहिले. त्याने या तत्काळ उत्तरासाठी रिक्रूटरचे कौतुक केले. कनोई म्हणाला, "रिक्रूटरच्या या प्रामाणिकपणामुळे माझा खूप वेळ वाचला. उत्तर कधी येईल, या विचारात फालतू फॉलो-अप करण्याची किंवा आठवडे वाट बघण्याची गरज उरली नाही."
नोकरी शोधणाऱ्या अनेक उमेदवारांना 'घोस्टिंग' या समस्येचा सामना करावा लागतो. घोस्टिंग म्हणजे, अर्ज केल्यानंतर कंपन्यांकडून कोणतेही उत्तर न मिळणे आणि अचानक संपर्क तोडणे. रिक्रूटरच्या या पारदर्शक आणि जलद प्रतिसादामुळे अनेकांना दिलासा मिळाला आहे.
सोशल मीडियावर युजर्सकडून कौतुकाचा वर्षाव
कनोईची ही पोस्ट धडाक्याने व्हायरल होत असून, हजारो युजर्सनी त्यावर प्रतिक्रिया दिल्या आहेत. एका युजरने लिहिले की, “लवकर रिजेक्शन मिळणे हा एकप्रकारे वरदानच आहे, कारण यामुळे आठवड्यांचे निरर्थक वाट बघत राहण्याची कटकट वाचली. ही प्रक्रिया अशीच सामान्य व्हायला हवी.” रिक्रूटरने दाखवलेला हा पारदर्शकपणा प्रत्येक कंपनीने अंगीकारायला हवा, असे मत अनेक नेटिझन्सनी व्यक्त केले आहे.