कोड्यात का बोलता? सरळ उघड बोला; निलेश राणे यांचे रवींद्र चव्हाण यांना खुले आव्हान

बळीचा बकरा व्हायला काल परवा राजकारणात आलो नाही; भाऊ नितेश राणे यांच्याही वक्तव्याचा घेतला समाचार

संदीप बोडवे
लोकमत न्यूज नेटवर्क

मालवण: 'दोन नंबर हा दोन नंबरचा राहणार' या रवींद्र चव्हाण यांच्या वक्तव्यावर निलेश राणेंनी खरपूस समाचार घेतला. "ते असं का बोलत आहेत, मला माहिती नाही, मात्र त्यांनी दिलेला दाखला हा स्वर्गीय आर आर पाटलांचा आहे. त्यामुळे त्यांना आता काँग्रेसवाले आठवायला लागले आहेत. रवींद्र चव्हाणांमधील अनेक बदलांमध्ये एक वेगळा बदल बघितला", असा खरमरीत टोलाही राणे यांनी लगावला. 

राणे मालवण येथे माध्यमांशी बोलत होते. ते म्हणाले, मुख्यमंत्री देवेंद्र फडणवीस यांच्या बद्दल आदर आहे. दररोज रवींद्र चव्हाण कोडवर्डमध्ये धमकी देत आहेत, त्यांनी उघड धमकी द्यावी. आपण छत्रपती शिवाजी महाराजांचे नाव घेतो, त्यामुळे आपण बिनधास्त पणे बोललं पाहिजे. चव्हाण हे कोडवर्डमध्ये धमकी देत आहे, ती त्यांची घमेंड आहे. या महाराष्ट्रात मोठमोठ्यांची घमेंड उतरली. म्हणून आपण परिस्थिती आटोक्यात कशी आणायची ते पहा, बिघडवू नका. 

नेमका बकरा कोणाचा झाला हे तीन तारखेला कळेल. नितेश राणेंच्या कालच्या टीकेला उत्तर दिले. माझं नाव घेऊन पत्रकार परिषदेंना गर्दी करू नका. मी रवींद्र चव्हाण यांच्यावरच टीका करत आहे. त्यामुळे माझं नाव घेण्याचा अधिकार त्यांना आहे. मी तुमच्यावर काहीच बोललो नाही आणि बोलणार देखील नाही. मला माझ्या मर्यादा माहिती आहेत. आपण एक आहोत हे विसरून चालणार नाही. तीन तारीख नंतर पुन्हा एकत्रच यायचं आहे. जिल्ह्यात ज्या घटना सुरू आहेत त्यावर मी बोलत आहे मी वैयक्तिक टीका कुणावरही करत नाही. माझा बळीचा बकरा कोणी करायला लावलाय का? एवढा दूध खुळा आहे का? काल-परवा राजकारणात आलो नाही. मला जे चुकीचं वाटतं त्यावर बोलतो.

निलेश राणेंना एकाकी पाडलं जातं यात काही तथ्य नाही. काल दीपक केसरकर यांनी माझ्यासाठी वक्तव्य केलीत. एकाकी पडलो असतो, तर आज एवढा बोललो नसतो. एकटा माणूस एवढं सगळं बोलू शकतो का. तीन तारीखेच्या रिझल्टवर लक्ष द्या. भाजपचा सिंधुदुर्ग जिल्ह्यात टांगा पलटी होणार आहे. टांगा पलटी झाल्यावर घोडे फरार होतात माहिती आहे ना, असा प्रतिउत्तर भावाला निलेश राणेंनी दिले आहे. उपमुख्यमंत्री एकनाथ शिंदे आज सिंधुदुर्ग जिल्ह्या दौऱ्यावर असून, दौऱ्याची सुरुवात मालवणमध्ये असून या सर्व घडामोडींवर शिंदे काय बोलणार आहेत याकडे महाराष्ट्राचे लक्ष लागून राहिले आहे.