तीन चोरट्यांना अटक

तीन आरोपींना मुद्देमालासह ताब्यात

सिंधुदुर्गनगरी : महिनाभर कणकवली, कुडाळ व सावंतवाडी या शहरांमध्ये घडलेले घरफोडीतील गुन्हे उघडकीस आले आहेत. पोलीस दलाने जिल्ह्यात ‘आॅपरेशन आॅल आऊट व आॅपरेशन कोंबिंग’ ही मोहीम राबवून जिल्ह्यात घरफोडी करणाऱ्या आंतरराज्य टोळीतील तीन आरोपींना मुद्देमालासह ताब्यात घेण्यात यश आले आहे. तर अद्यापही एका आरोपीचा शोध सुरु आहे. ही टोळी मूळची मध्य प्रदेश येथील असून, यातील उर्वरित आरोपींना लवकरच गजाआड करू, अशी माहिती जिल्हा पोलीस अधीक्षक दत्तात्रय शिंदे यांनी दिली. दरम्यान, अटक करण्यात आलेल्या आरोपींमध्ये सुरेश सुभान मोहेल (वय २०), अशोक ध्यानसिंग अजनार (२५), रमेश जवान सिंह (२५) सर्व राहणार बघोली, ता. कुक्सी, जिल्हा धार- मध्य प्रदेश यांचा समावेश आहे. दरम्यान, वरील तिन्ही संशयितांना २१ जुलैपर्यंत न्यायालयाने पोलीस कोठडी सुनावली. जिल्हा पोलीस अधीक्षक दत्तात्रय शिंदे म्हणाले की, जिल्ह्यात १ जूनपासून कुडाळ, कणकवली, सावंतवाडी या शहरांसह अन्य शहरांमध्ये एकूण २४ घरफोड्या दाखल झालेल्या आहेत. त्यापैकी वरील तिन्ही तालुक्यांमध्ये प्रत्येकी चार घरफोड्या झालेल्या आहेत. या घरफोड्या एका ठरावीक विशिष्ट प्रकारे गुन्हे करणाऱ्या टोळीने केल्या असल्याची शक्यता होती हे आरोपींनी केलेल्या गुन्ह्याच्या कार्यप्रणालीवरून स्पष्ट होत होते. घरफोडीतील गुन्हेगार लवकरात लवकर ताब्यात घेण्यासाठी जिल्ह्यात १० जुलैला आॅपरेशन आॅल आऊट ही विशेष मोहीम राबविली होती. या मोहिमेत पोलीस अधीक्षकांपासून कर्मचाऱ्यांपर्यंत रात्रभर गुन्हेगारांचा शोध घेत होते. १२ जुलैला कुडाळ पोलीस ठाण्यातील हवालदार कमलाकर साळसकर यांनी शहरातील बस स्टँड व वेताळबांबर्डे याठिकाणी एका संशयितास हटकून त्याच्याकडे चौकशी करीत असताना तो त्याच्याकडील बॅग टाकून पळून गेला. त्याच्याकडील मिळालेल्या बॅगेमध्ये साहित्य हे कुडाळ शहरातील झालेल्या घरफोडीतील असल्याचे निष्पन्न झाले. या आरोपीचा शोध घेण्यासाठी जिल्ह्यातील सर्व पोलीस अधिकारी व कर्मचारी यांना वेताळबांबर्डे, ओरोस, सुकळवाड, तळगाव या परिसरामध्ये एकत्र करून सर्व अधिकारी व कर्मचाऱ्यांच्या मदतीने कोंबींग आॅपरेशन राबविण्यात आले. या मोहिमेत जिल्ह्यातील १० अधिकारी १०० पोलीस कर्मचारी सहभागी झाले होते. त्यामुळे आरोपी सुरेश मोहेल याला तळगाव क्रॉसिंग येथे सायंकाळी ६.३० वाजता अटक करण्यात आली. या आरोपीजवळ प्लेट, कमळ करंडा, वडघा, वेडणे, जोड करंडा, समर्ई, कंबर साखळी, पैजण, अगरबत्तीचे भांडे, निरंजन, नाणी, वाळा या सर्व वस्तू चांदीच्या होत्या तर ३१ हजार १९५ एवढी रोख रक्कम सापडली. आरोपी सुरेशकडून त्याचे इतर साथीदार कणकवली शहर परिसरात असल्याची माहिती मिळाली. त्यानुसार तत्काळ १५ अधिकारी व १७० कर्मचारी कणकवली येथे पोचले. त्या परिसरामध्ये कोंबींग आॅपरेशनद्वारे परिसर पिंजून काढून दुसरा आरोपी अशोक अजनार याला कणकवली एस. टी. स्टँड परिसरात रात्री १० वाजता ताब्यात घेण्यात आला. त्याच्याकडे चोरी करण्यासाठी वापरण्यात आलेले साहित्य मिळून आले असून त्याची किंमत २४०० रुपये एवढी आहे. त्यानंतर पुन्हा कोंबींग आॅपरेशन राबवून तिसरा आरोपी रमेश सिंह याला १३ जुलै रोजी सकाळी ८ वाजता अटक करण्यात आली. हा आरोपीदेखील कणकवली एस. टी. स्टँड परिसरात सापडला. त्याच्याकडेदेखील मिळालेल्या बॅगेमध्ये चोरी करण्यासाठी वापरण्यात आलेले साहित्य मिळून आले असून त्याची किंमत २४०० रुपये एवढी आहे. (प्रतिनिधी)