Satara Politics: फलटणमध्ये कोण मस्ती करतोय, त्याचा आवाज बंद करतो; एकनाथ शिंदे यांचा हल्लाबोल

Local Body Election: ‘शेर कभी बुढा नही होता’..., मुलासाठी प्रोटोकॉल सोडून ‘रामराजे’ आले व्यासपीठावर

फलटण : ‘एक सुरक्षित आणि सुंदर फलटण आपल्याला करायचं आहे. फलटणला जगाच्या नकाशावर स्थान मिळवून द्यायचं आहे. मी आपल्याला एवढं सांगेन, मी काय कमवलं यापेक्षा मी लोकांना काय दिलं हे मानणाऱ्यांमधला मी आहे. माझं बारीक लक्ष असतं. इथं कोण जास्त मस्ती करतोय, कोण काय करतोय, त्याचा बरोबर आवाज बंद करतो’, अशी टीका उपमुख्यमंत्री एकनाथ शिंदे यांनी केली.

फलटण नगरपालिका निवडणुकीतील उमेदवारांच्या प्रचारासाठी गजानन चौकात शुक्रवारी (दि. २८) सभा झाली. यावेळी ते बोलत होते. सभेला जिल्ह्याचे पालकमंत्री शंभूराज देसाई, विधान परिषदेचे माजी सभापती रामराजे नाईक निंबाळकर, आमदार महेश शिंदे, माजी आमदार दीपक चव्हाण, नगराध्यक्ष पदाचे उमेदवार अनिकेतराजे नाईक निंबाळकर, जिल्हा परिषदेचे माजी अध्यक्ष संजीवराजे व रघुनाथराजे उपस्थित होते.

‘शेर कभी बुढा नही होता’...

फलटणच्या आणि तुमच्या स्वाभिमानासाठी, तसेच लाडक्या बहीण-भावांच्या उज्ज्वल भविष्यासाठी तुम्हाला ‘भयमुक्त आणि दहशतमुक्त’ फलटण देण्यासाठी मी इथं आलोय. खोटे गुन्हे दाखल करण्याचा प्रकार थांबवा. महिला डॉक्टरला न्याय मिळवून देणार आहे. तसेच आणखी एक सांगतो, ‘शेर कभी बुढा नही होता.’ रामराजे धाडसी आहेत. फलटणला भयमुक्त बनवण्यासाठी त्यांनी शिंदेसेनेसोबत जाण्याचा धाडसी निर्णय घेतला आहे, असे एकनाथ शिंदे म्हणाले.

फैसला ऑन द स्पॉट...

उपमुख्यमंत्री शिंदे यांनी फलटणमधील भर सभेतून उद्योगमंत्री उदय सामंत यांना स्पीकरवर फोन लावला. फलटण येथील सुरवडी एमआयडीसीचा विस्तार व्हावा, यासाठी प्रस्ताव प्रलंबित आहे. ढवलेवाडी, नांदल, सुरवडी व परिसरातील शेतकऱ्यांची जमीन देण्याची तयारी आहे. निवडणुकीची आचारसंहिता झाल्यानंतर एमआयडीसीचा प्रश्न मार्गी लावा, अशी सूचना सामंत यांना दिली. त्यांनी होकार दिल्यावर तुमच्या वतीने मी शब्द देतोय, असे जाहीर सभेत सांगितले. याच सभेत मंत्री प्रकाश आबिटकर यांना फलटणसाठी १०० बेडचे सुसज्ज हॉस्पिटल देण्याची सूचना केली.

‘तेव्हा करेक्ट कार्यक्रम’ : रामराजे

एकनाथ शिंदे हे सातारचे भूमिपुत्र आहेत. आता त्यांनी जिल्ह्याच्या राजकारणात लक्ष घातले आहे. माझ्या कुटुंबाने शिंदे साहेबांबरोबर जायचा निर्णय घेतला आहे. मला स्वतःला कुठलीही महत्त्वाकांक्षा नाही. त्यामुळे प्रोटोकॉल बाजूला ठेवून मी या सभेत आलोय. मी एवढच सांगेन, मी महायुतीत आहे. कोणत्याही पक्षात माझे शत्रू नाहीत. मी जास्त बोलत नाही, शांत असतो. पण जेव्हा करायचा तेव्हा ‘करेक्ट कार्यक्रम’ करतो. ‘जय महाराष्ट्र’ असे रामराजे नाईक निंबाळकर यांनी म्हणताच उपस्थितांनी जल्लोष केला.