वसाहत औद्योगिक; पण ‘उद्योग’ भलतेच!, सहा कोटींचे 'कोकेन' सापडल्याने कंपन्यांचा कारभार संशयाच्या भोवऱ्यात

काहींच्या मनात खोट, उद्योजकांना लागतेय गालबोट

संजय पाटील

कऱ्हाड : तासवडे, ता. कऱ्हाड येथील औद्योगिक वसाहत म्हणजे भांडवलदारांची अर्थवाहिनी. कष्टकरांच्या उपजीविकेचे साधन. आणि जिल्ह्याच्या उद्योगविश्वाचा भक्कम पाया. मात्र, खत कंपनीतील सहा कोटी 'कोकेन'च्या कारवाईने हाच पाया पुरता हादरला. मुळात ही वसाहत औद्योगीक; पण येथे चालणारे भलतेच ‘उद्योग’ आता चव्हाट्यावर आले असून वसाहतीतील इतर कंपन्यांचा कारभारही संशयाच्या भोवऱ्यात आला आहे.

कऱ्हाडजवळच्या तासवडे औद्योगिक वसाहतीत उत्पादन, प्रक्रिया तसेच कच्चा आणि पक्का माल तयार करणाऱ्याअनेक कंपन्या आहेत. या कंपन्यांच्या माध्यमातून वसाहतीत दररोज कोटींची उलाढाल होत असते. कंपन्यांमध्ये परप्रांतीयांसह अनेक स्थानिक कामगार कार्यरत आहेत. सध्या नव्याने काही कंपन्या येथे स्थिरस्थावर होत आहेत. तर काही कंपन्या वर्षानुवर्ष याठिकाणी सुरू आहेत.

‘सुर्यप्रभा फार्माकेम’ ही कंपनी २०१७ साली येथे उभारली गेली. या कंपनीचा रासायनिक खत निर्मितीचा परवाना आहे. मात्र, प्रत्यक्षात खताबरोबरच येथे कोकेन तयार केले जात असल्याचे पोलिसांच्या कारवाईतून स्पष्ट झाले आहे. खायचे आणि दाखवायचे दात वेगळे, असाच प्रकार या कंपनीत घडला आहे.

मुळातच या औद्योगिक वसाहतीत असलेल्या अनेक कंपन्यांच्या कारभारावर कोणाचेच नियंत्रण नसल्याची परिस्थिती आहे. कंपनी व्यवस्थापनाकडे परवाना आहे का, त्या परवान्याचे नुतनीकरण केले आहे का तसेच ज्या कारणासाठी परवाना घेतला तेच काम त्या कंपनीत होतेय का, याची कसलीच शहानीशा होताना दिसत नाही. दुधासह फळांवर प्रक्रिया करणारे उद्योग याठिकाणी आहेत.

मात्र, त्याठिकाणी बनविल्या जाणाऱ्या पेय अथवा पदार्थाचा दर्जा, त्याच्यातील घटक, घटकांची गुणवत्ता, भेसळ याचीही तपासणी अपवाद वगळता केली जात नाही. ‘सुर्यप्रभा’मध्ये उत्पादीत झालेले कोकेन हे प्रशासनाच्या याच भोंगळ कारभाराचे तसेच कंपन्यांवर नसलेल्या नियंत्रणाचे द्योतक आहे, असे म्हणावे लागेल.

औद्योगिक वसाहतीत..

• ४७२ : नोंदणीकृत कंपन्या
• ३५३ : सुरू असलेल्या कंपन्या
• ११९ : बंद स्थितीतील कंपन्या

पोलिसांचे केवळ रस्त्यावर पेट्रोलिंग

तासवडेची औद्योगिक वसाहत तळबीड पोलिसांच्या कार्यक्षेत्रात येते. मुळातच पोलीस ठाणे या वसाहतीपासून हाकेच्या अंतरावर आहे. मात्र, पोलीस केवळ पेट्रोलिंगपुरतेच वसाहतीत जातात. बाकी कंपन्यांच्या आतमध्ये रात्रंदिवस नेमके काय चालते, याची पाहणी कोणीही करीत नाही. वसाहतीचा विस्तार मोठा आहे. तसेच प्लॉटनुसार त्याचे वर्गीकरण करुन रस्ते तयार करण्यात आलेत. रात्री पोलिसांची जीप या रस्त्यावरुन गस्त घालते एवढेच.

कशाच्या किती कंपन्या?

• १८ टक्के : कापड निर्मिती
• २३ टक्के : अभियांत्रीकी
• ११ टक्के : औषधे
• १४ टक्के : दुध, फळप्रक्रिया
• ६ टक्के : खत उत्पादन
• २८ टक्के : इतर

चार गावांच्या जमिनीवर वसाहत

कऱ्हाड उत्तरेतील तळबीड, वराडे, तासवडे आणि बेलवडे हवेली गावातील ग्रामस्थांच्या जमिनी घेवून औद्योगिक वसाहत उभारण्यात आली आहे. वसाहतीसाठी शेकडो एकर जमिन ग्रामस्थांकडून घेण्यात आली असून त्यावरच अनेक कंपन्या उभ्या राहिल्या आहेत..