झुडपांचा अडथळा

कऱ्हाड : किरपे ते सुपने या मार्गावर अनेक ठिकाणी मोठ्या प्रमाणात धोकादायक वृक्ष वाढले आहेत. या वृक्षांच्या फांद्यामुळे मोठ्या वाहनांचे नुकसान होत आहे. या मार्गावर रहदारी मोठ्या प्रमाणावर असते. मालवाहतूक वाहनांचीही ये-जा असते. मोठ्या वाहनांच्या काचांना वृक्षांच्या फांद्या थटून काचा फुटत आहेत. या धोकादायक फांद्या तसेच वृक्ष हटविण्याची मागणी होत आहे.

वानरांकडून नुकसान

तांबवे : सुपने परिसरात हंगामातील पिकांचे वानरांकडून मोठ्या प्रमाणावर नुकसान केले जात आहे. तसेच गावठाणातही वानरांच्या टोळीने शिरकाव केला असून, त्यांच्याकडून घरांच्या छतांचे नुकसान केले जात आहे. त्यामुळे ग्रामस्थ व शेतकरी चिंताग्रस्त झाले आहेत. हंगामातील पिके सध्या जोमात आली आहेत. त्यातच वानरांचा उपद्रव वाढल्यामुळे शेतकरी हतबल झाल्याचे दिसून येत आहे.

एसटीची मागणी

रामापूर : कोरोनाचा प्रादुर्भाव वाढू नये म्हणून प्रशासनाच्या वतीने ग्रामीण भागातील एसटी फेऱ्या बंद करण्यात आल्या होत्या. एसटी पुन्हा सुरू करण्यात यावी, अशी मागणी ग्रामीण भागातील प्रवाशांतून होत आहे. पाटण ते कोयना, पाटण ते कुसरूंड, पाटण ते चाफोली, पाटण ते मणदुरे, पाटण ते सणबुर, पाटण ते ढेबेवाडी आदी मार्गांवर एसटीच्या फेऱ्या सुरू करण्याची मागणी प्रवाशांकडून केली जात आहे.

अंधाराचे साम्राज्य

मलकापूर : मलकापूर भाजी मंडई ते कृष्णा रुग्णालय परिसरात उपमार्गावर महिलांची नेहमीच वर्दळ असते़ या परिसरात पथदिव्यांची कोणतीही सोय नसल्याने अनेक वेळा अनुचित प्रकार घडतात़ हा परिसर रात्रीच्या वेळी निर्मनुष्य असतो. तसेच येथे उड्डाणपूल असल्याने अंधाराचे साम्राज्य असते. अनुचित घटना रोखण्यासाठी येथे पथदिव्यांची सोय करणे गरजेचे आहे़