माजी विद्यार्थिनीच्या मदतीसाठी सरसावली शाळा

‘स्त्री शिक्षणाकडून स्त्री शक्ती संवर्धनाकडे’ हा वसा जोपासत संस्कारक्षम शिक्षणातून विद्यार्थिनींच्या जडणघडणीसाठी कऱ्हाडमधील शेठ रामबिलास किसनलाल लाहोटी कन्या प्रशाला कार्यरत आहे. केवळ ज्ञानदानच नव्हे, तर भावी आयुष्यात येणाऱ्या अडचणींमध्येही प्रशाला विद्यार्थिनींना मदत करत आली आहे. २००८-०९ या शैक्षणिक वर्षामध्ये आपले माध्यमिक शिक्षण पूर्ण करून उच्च शिक्षणासाठी पुणे गाठलेली, त्याचबरोबर महिला आणि मुलींच्या हक्क व कर्तव्यासाठी जागरूक असणारी प्रशालेची माजी विद्यार्थिनी धनश्री कुंभार हिचा पुणे येथे भीषण अपघात झाला. रिक्षाने दिलेल्या धडकेमध्ये ती कोमात गेली असून, तिच्यावर शर्थीचे वैद्यकीय उपचार सुरू आहेत. जीवरक्षक प्रणालीवर तिला नैसर्गिक श्वासोच्छ्वास मिळवून देण्यासाठी डॉक्टर, नर्सेस प्रयत्नांची पराकाष्टा करीत आहेत, तर तिच्या वैद्यकीय मदतीसाठी आवश्यक असणारा निधी उभारण्यासाठी तिचे पालक धडपडत आहेत. अशा कठीण प्रसंगी फक्त बघत राहील ती शाळा कसली? म्हणूनच लाहोटी कन्या प्रशालेचे सर्व शिक्षक आणि शिक्षिका यांनी स्वयंप्रेरणेतून धनश्रीच्या वैद्यकीय मदतीसाठी म्हणून आर्थिक मदत केली. या मदतीतून जमलेली २१ हजार रुपयांची रक्कम प्रशालेच्या मुख्याध्यापिका शर्मिला बायस यांनी कमल कुंभार यांच्याकडे सुपूर्द केली. त्या प्रशालेच्या माजी शिक्षिका असून धनश्रीच्या नातेवाईक आहेत. तिच्या वैद्यकीय मदतीसाठी लवकरच धनश्रीकडे ती रक्कम घेऊन जाणार आहेत.