पालिका इमारतीमुळे वाढली वाईची शान

आज सोहळा : शरद पवार यांच्या हस्ते मकरंद पाटील यांचा नागरी सत्कार; जिल्ह्यातील राष्ट्रवादी आमदार राहणार उपस्थित

वाई : ऐतिहासिक व सांस्कृतिक वारसा असणाऱ्या वाई शहराच्या नावलौकिकात भर टाकणारी व अत्याधुनिक तंत्रज्ञानाने साकारलेली संपूर्ण राज्याला आदर्शवत ठरणाऱ्या वाई नगरपालिकेच्या प्रशासकीय इमारतीचे उद्घाटन मंगळवारी होत आहे. पश्चिम महाराष्ट्रातील सर्वात भव्य अन् प्रशस्त इमारतीचा मान वाई नगरपालिकेने पटकाविला आहे.वाई-खंडाळा-महाबळेश्वर या भिन्न भौगोलिक परिस्थितीच्या मतदारसंघातील आमदार मकरंद पाटील यांच्या नागरी सत्कार राष्ट्रवादी काँग्रेस पक्षाचे अध्यक्ष व माजी केंद्रीय कृषिमंत्री खासदार शरद पवार यांच्या हस्ते होत आहे. यावेळी विधान परिषदेचे सभापती रामराजे नाईक-निंबाळकर, माजी उपमुख्यमंत्री अजित पवार, खासदार उदयनराजे भोसले, माजी खासदार लक्ष्मणराव पाटील, आमदार शशिकांत शिंदे, जिल्हा बँकेचे अध्यक्ष आमदार शिवेंद्रसिंहराजे भोसले उपस्थित राहणार आहेत.वाई शहराच्या लोकसंख्येत झपाट्याने वाढ होत आहे. भविष्याचा वेध घेऊन आधुनिक तंत्रज्ञानाने साकारलेली सुसज्ज व एकाच छताखाली सर्व सुविधानियुक्त अशा इमारतीची मोठी आवश्यकता व गरज होती. नवीन प्रशासकीय इमारतीला २००९ मध्ये प्रशासकीय मंजुरी मिळाली होती. त्यानंतर आमदार मकरंद पाटील यांच्या विशेष प्रयत्नातून सुमारे सात कोटींची भव्य इमारत उभी राहिली आहे. या इमारतीच्या पहिल्या मजल्यावर नगरपालिकेचे नगराध्यक्ष, उपनगराध्यक्ष, मुख्याधिकारी यांची कार्यालये व नागरिकांसाठी असणारे सर्व कर भरणाकेंद्र, पाणीपुरवठा विभाग, नागरी सुविधा विभाग, आरोग्य विभाग आहेत. दुसऱ्या मजल्यावर सर्व विभागाच्या सभापतींसाठी स्वतंत्र कक्ष आहेत.बांधकाम विभाग, नगररचना विभाग, आस्थापना विभाग, विरोधी नेता कक्ष असे स्वतंत्र कक्ष करण्यात आले आहेत. लिफ्टची सोय आहे. तिसऱ्या मजल्यावर भव्य सभागृह, कॉन्फरन्स हॉल, गेस्ट रूम यात वेब कॅमेरा, सर्वत्र सीसीटीव्ही बसविण्यात आले आहेत. पालिकेची अत्याधुनिक तंत्रज्ञानाने विकसित साकारलेली भव्य इमारतीचा लोकार्पण सोहळा पार पडत आहे. वाई पालिकेच्या इमारतीत सर्व विभागांसाठी स्वतंत्र कक्ष, सभापतींसाठी स्वतंत्र दालन तयार करण्यात आले आहे. त्यामुळे कर्मचाऱ्यांना चांगली काम करण्याची ऊर्जा मिळणार आहे. त्यामुळे या कार्यालयाचे कधी उद्घाटन होईल, याकडे कर्मचारी त्याचप्रमाणे वाई शहरातील नागरिकांचे लक्ष लागून राहिले आहे. (प्रतिनिधी) वाई-खंडाळा- महाबळेश्वर या सर्वात मोठ्या व भिन्न भौगोलिक परिस्थितीच्या मतदारसंघाचे नेतृत्त्व करण्याची संधी मला येथील जनतेने सलग दोन वेळा दिली. यात वाईकर नागरिकांचा मोठा वाटा आहे. या इमारतीच्या पूर्णत्वासाठी मोठा निधी उपलब्ध करता आला व निवडणुकीत दिलेला शब्द पाळता आला, याबद्दल समाधानी आहे.- मकरंद पाटील, आमदार