लोकमत न्यूज नेटवर्क
सातारा : मोबाइलमुळे अवघं जग आपल्या मुठीत आलं. संवाद अधिक जलद गतीने होऊ लागला. आज घरात जितके सदस्य तितकेच मोबाइल आपल्याला पाहायला मिळतात. या बदलात लँडलाइन व कॉइन बॉक्सची ट्रिंगट्रिंग मात्र अजूनही सुरू आहे. या उपकरणांचा वापर भलेही कमी झाला असला तरी मोबाइल क्रांतीत ते आपले अस्तित्व टिकवून आहेत.
दहा-पंधरा वर्षांपूर्वी मोबाइल केवळ बड्या लोकांच्या हातातच पाहायला मिळत होता. तेव्हा मोबाइलच्या किमती अधिक होत्या शिवाय तो वापरणे सर्वसामान्यांच्या आवाक्याबाहेर होते. त्यामुळे सर्वसामान्यांपासून ते मोठमोठ्या कंपन्यांमध्ये लँडलाइन फोन वापरले जायचे. याची संख्या लाखांमध्ये होती. यानंतर ‘एका रुपयात भारतात कुठेही बोला’ ही नवी संकल्पना घेऊन कॉइन बॉक्सचे आगमन झाले अन् सर्वसामान्यांना आप्तस्वकीयांशी संवाद करणं सोपं झालं.
अगदी खेड्यापासून ते मोठ्या शहरांपर्यंत या कॉइन बॉक्सने मानाचे स्थान मिळविले. मात्र, मोबाइल क्रांती झाली अन् लँडलाइन, कॉइन बॉक्स घर व दुकानांमधून हद्दपार झाला. सद्य:स्थितीत जिल्ह्यात २७ हजार लँडलाइन फोन तर केवळ ४५० कॉइन बॉक्स शिल्लक आहेत.
(चौकट)
तब्बल २७ हजार लँडलाइन
मोबाइल क्रांतीतही लँडलाइन फोन आपले अस्तित्व आजही टिकवून आहे. शासकीय कार्यालय, रुग्णालय, खासगी कंपन्या, औद्योगिक वसाहती व घरांमध्ये सध्याच्या घडीला तब्बल २७ हजार लँडलाइन असल्याची नोंद दूरध्वनी विभागाच्या दप्तरी आहे.
(चौकट)
जिल्ह्यात ४५० कॉइन बॉक्स
जिल्ह्यात एक काळ असा होता की, टपरीच नव्हे, तर मोठ्या दुकानांच्या बाहेरही कॉइन बॉक्स नजरेस पडत होता. एकेका दुकानात तर तीन-चार कॉइन बॉक्स होते. मोबाइल क्रांतीमुळे कॉइन बॉक्सचा वापर कमी होत गेला. आता जिल्ह्यात केवळ ४५० कॉइन बॉक्स उरले असून, तेही नावापुरतेच उरले आहेत.
(चौकट)
कॉइन बॉक्स वापरणारे कोण?
जिल्ह्यातील वसतिगृह, ठराविक पानटपऱ्या व काही रुग्णालयांच्या आवारातच असे कॉइन बॉक्स आपल्याला पाहायला मिळतात; परंतुु याचीही संख्या बोटावर मोजण्याइतकी आहेत. मोबाइल कंपन्यांनी ग्राहकांच्या खिशाला कात्री लागणार नाही, अशा योजना सुरू केल्याने कॉइन बॉक्सवर वेळ व पैसा घालविणे अनेकांनी बंद केले आहे.
(कोट)
म्हणून लँडलाइन आवश्यकच
रुग्णालय, शाळा व खासगी कंपन्यांमध्ये लँडलाइन अधिक गरजेचा आहे. ही सेवा अत्यंत कमी वेळा खंडित होते. त्यामुळे मोबाइल बंद झाला तरी लँडलाइनवर वेळेत व कोठेही संवाद साधता येतो.
- विजया बावळेकर, महाबळेश्वर
(कोट)
बहुतांश घरांमध्ये आजही लँडलाइन फोन वापरले जातात. वयोवृद्ध व्यक्ती किंवा ज्यांना मोबाइल हाताळता येत नाही अशांना लँडलाइन वापरणे अधिक सोयीचे ठरते. अनेकांना लँडलाइनच बरा वाटतो.
- विक्रांत पवार, सातारा