माजी सरन्यायाधीश भूषण गवई यांना दादा उंडाळकर सामाजिक पुरस्कार जाहीर

कराड (जि. सातारा) : स्वातंत्र्यवीर दादा उंडाळकर स्मारक समिती यांच्या वतीने प्रतिवर्षी दिला जाणारा प्रतिष्ठेचा स्वातंत्र्यसेनानी दादा उंडाळकर सामाजिक पुरस्कार यावर्षी देशाच्या सर्वोच्च न्यायालयाचे सेवानिवृत्त सरन्यायाधीश भूषण गवई यांना जाहीर करण्यात आला आहे, अशी माहिती समितीचे विश्वस्त व जिल्हा परिषद सदस्य ॲड. उदयसिंह पाटील उंडाळकर यांनी कराड येथे आयोजित पत्रकार परिषदेत दिली.

उदयसिंह पाटील म्हणाले की, स्वातंत्र्यवीर दादा उंडाळकर यांच्या ५२ व्या स्मृतिदिनानिमित्त उंडाळे येथे बुधवार, दि. १८ रोजी होणाऱ्या ४३ व्या स्वातंत्र्यसंग्राम सैनिक अधिवेशन व माजी सैनिक मेळाव्यात हा पुरस्कार प्रदान करण्यात येणार आहे. ५१ हजार रुपये रोख, शाल, श्रीफळ व मानपत्र असे पुरस्काराचे स्वरूप आहे.

९९व्या अखिल भारतीय मराठी साहित्य संमेलनाचे अध्यक्ष, ज्येष्ठ साहित्यिक विश्वास पाटील यांच्या हस्ते पुरस्कार प्रदान केला जाणार आहे. यावेळी केंद्रीय प्रशासकीय न्यायाधिकरणाचे अध्यक्ष व मेघालय उच्च न्यायालयाचे निवृत्त न्यायमूर्ती रणजीत मोरे, मुंबई उच्च न्यायालयाचे निवृत्त न्यायमूर्ती प्रदीप देशमुख प्रमुख पाहुणे म्हणून उपस्थित राहणार आहेत.