लोकमत न्यूज नेटवर्क
सांगली : शहरातील अयोध्यानगरजवळ पिस्तूल विक्रीसाठी थांबलेल्या तरुणास स्थानिक गुन्हे अन्वेषण शाखेच्या पथकाने अटक केली. विनायक सुकुमार कोळी उर्फ लाड (वय २४, रा. माळवाडी, शिरोली पुलाची, जि. कोल्हापूर) असे संशयिताचे नाव असून त्याच्याकडून ४० हजार रुपये किंमतीचे पिस्तूल व दोन जिवंत काडतुसे असा ४० हजार ८०० रुपयांचा माल जप्त करण्यात आला आहे.
शहरातील अवैध धंद्यांवर कडक कारवाईचे आदेश अधीक्षक दीक्षित गेडाम यांनी दिले आहेत. त्यानुसार एलसीबीचे पथक गस्तीवर असताना, शहरातील अयोध्यानगरजवळील चौकात आंबा चौकाकडे जाणाऱ्या रस्त्यावर एक तरुण पिस्तूल विक्रीसाठी थांबल्याची माहिती पथकाला मिळाली. पथकाने त्यास ताब्यात घेत झडती घेतली असता, त्याच्या कमरेला चॉकलेटी ग्रीप असलेले पिस्तूल मिळाले. पथकाने ते जप्त करत त्याच्यावर संजयनगर पोलिसात गुन्हा दाखल करण्यात आला आहे.
एलसीबीचे निरीक्षक सर्जेराव गायकवाड यांच्या मार्गदर्शनाखाली सहायक निरीक्षक प्रशांत निशानदार, सुभाष सूर्यवंशी, जितेंद्र जाधव, दीपक गट्टे आदींच्या पथकाने ही कारवाई केली.