मिरज : मिरजेत रेल्वेस्थानक परिसरात व्यापाऱ्यांना लुटण्याचा प्रयत्न करणाऱ्या तिघांना पोलिसांनी अटक केली. पोलिसांनी तिन्ही गुन्हेगारांना घटनास्थळी नेऊन त्यांची धिंड काढली. त्यांचे दोघे साथीदार फरारी असून, त्यांचा शोध सुरू असल्याचे पोलिसांनी सांगितले. याबाबत व्यापारी अविनाश प्रकाश रोहिडा यांनी गांधी चाैक पोलिसांत फिर्याद दिली आहे.
लूटमार करणाऱ्या रोहन राजाराम यादव (वय १९, रा. नदीवेस, मिरज), अझरुद्दीन नैरुद्दीन अबुफजल (वय ३२, रा. कोल्हापूर रोड, मिरज) व भाऊ उर्फ आसीफ शकील मुल्ला (वय २४, रा. मीरासाहेब दर्ग्याजवळ, मिरज) या तिघांना अटक केली. तर शोएब व एक अनोळखी असे दोघेजण फरारी आहेत. अटक केलेल्या तिघांना न्यायालयाने त्यांना शुक्रवारपर्यंत पोलीस कोठडी सुनावली आहे.
मंगळवारी रात्री ९ वाजता पाच नशेखोरांनी रेल्वेस्थानक रस्त्यावर दुकानात जाऊन गॉगल, बेल्ट, चप्पल, कपडे असे साहित्य खरेदी केले. या साहित्याचे पैसे न देता शेजारच्या दुकानातून शेंगदाणे फुकटात घेतले. व्यापाऱ्यांनी पैशाची मागणी केल्यानंतर एका व्यापाऱ्यास मारहाण केली. एकाने चाकू दाखवून पैसे मागितल्यास भोसकण्याची धमकी दिली. सर्व जण रोहिडा याच्या मोबाइल दुकानात जाऊन काउंटरवर ब्लेडने वार केले. यामुळे व्यापाऱ्यांची धावपळ उडाली. याबाबत माहिती मिळाल्यानंतर पोलिसांनी घटनास्थळी धाव घेतली. पोलिसांनी रोहन, अझरुद्दीन, असिफ यांना घटनास्थळीच अटक केली, तर शोएब व अन्य एकाने पलायन केले.
अटक केलेल्या तिघांना घेऊन बुधवारी सकाळी पोलिसांनी तिघांकडून घटनास्थळी गुन्ह्याचे प्रात्यक्षिक केले. अटक केलेले सर्व जण सराईत चोरटे असल्याने पोलिसांनी त्यांच्या घराची झडती घेतली. दहशत निर्माण करणाऱ्या गुन्हेगारांची धिंड काढून पोलिसांनी त्यांना चोप दिला.