Sangli News: रांजणी येथील ड्रायपोर्ट प्रकल्पाचे स्वप्न अधांतरी

युवकांच्या रोजगाराच्या आशा धूसर बेरोजगार तरुणांचा सवाल : विकासाचे प्रकल्प कागदावरच का?

कवठेमहांकाळ : तालुक्यातील रांजणी येथे प्रस्तावित ड्रायपोर्ट प्रकल्प अनेक वर्षांपासून रखडलेला असून, त्यामुळे या दुष्काळी भागाच्या औद्योगिक आणि आर्थिक विकासाची मोठी संधी अधांतरी राहिली आहे.

सुमारे १२८ हेक्टर क्षेत्रावर (३७ हेक्टर खासगी व ९१ हेक्टर शासकीय जमीन) हा प्रकल्प उभारण्याचा प्रस्ताव आहे. २०१८ मध्ये भूनिवड समितीने स्थळ पाहणी केली होती. त्यानंतर विविध स्तरांवर हालचाली सुरू झाल्या. २०२२ मध्ये केंद्र आणि राज्य सरकारच्या समन्वयातून, तसेच नवीन पुणे-बंगळुरू महामार्गासोबत हा प्रकल्प सुरू होईल, अशी घोषणा करण्यात आली. मात्र, आजतागायत प्रत्यक्ष काम सुरू झालेले नाही.

या प्रकल्पाचा सर्वांत मोठा फायदा शेतकऱ्यांना होणार आहे. कृषीमाल निर्यात सुलभ होणार, वाहतूक खर्च कमी होणार आणि बाजारपेठेपर्यंत पोहोचणे सोपे होणार आहे तसेच या प्रकल्पात सुमारे २५ एकर क्षेत्र रेल्वे सायडिंगसाठी वापरण्याचा प्रस्ताव असल्याने मालवाहतूक अधिक सुलभ होणार आहे.

भूसंपादन प्रक्रिया, प्रशासकीय मंजुरी, विविध विभागांमधील समन्वयाचा अभाव यामुळे प्रकल्प रखडल्याचे सांगितले जाते. काही बैठका पार पडल्या असून सकारात्मक हालचाली दिसत असल्या तरी प्रत्यक्षात कामाची गती अत्यंत मंद आहे. या प्रकल्पामुळे स्थानिक युवकांना मोठ्या प्रमाणावर रोजगार उपलब्ध होऊ शकतो तसेच वाहतूक, गोदाम, लॉजिस्टिक आणि संबंधित उद्योगांना चालना मिळू शकते. त्यामुळे हा प्रकल्प तालुक्याच्या विकासासाठी अत्यंत महत्त्वाचा मानला जातो.

प्रकल्पाच्या घोषणा होतात, पण काम सुरू होत नाही,अशी नाराजी नागरिक व्यक्त करत आहेत.शासनाने तातडीने अडथळे दूर करून प्रकल्पाला गती दिली नाही, तर विकासाची ही मोठी संधी कायमची हुकण्याची भीती व्यक्त होत आहे.

रांजणी ड्रायपोर्ट प्रकल्पामुळे शेतकऱ्यांना बाजारपेठ आणि तरुणांना रोजगाराची मोठी संधी मिळू शकते. मात्र वर्षानुवर्षे प्रकल्प रखडल्याने विकासाची ही संधी हुकत आहे. शासनाने तातडीने निर्णय घेऊन काम सुरू करणे आवश्यक आहे. - दिगंबर कांबळे, शेकाप नेते, शिरढोण