ZP Election: सांगली जिल्हा परिषद मतदारसंख्येत १० व्या स्थानी, सरासरी २९ हजार ८१५ मतदार

पुरुष मतदार अधिक, सर्वाधिक मतदार कुठं.. वाचा 

सांगली : सांगली जिल्ह्यात जिल्हा परिषदेच्या एका गटासाठी सरासरी २९ हजार ८१५ मतदारसंख्या असेल. निवडणूक प्रशासनाने जिल्हा परिषदेचे ६१ गट आणि पंचायत समित्यांच्या १२२ गणांची मतदारसंख्या निश्चित केली आहे.

नगरपालिका आणि नगर परिषदांच्या निवडणुका २ डिसेंबर रोजी होतील. ३ डिसेंबर रोजी मतमोजणीनंतर जिल्हा परिषद व पंचायत समित्यांच्या निवडणुकांची प्रक्रिया सुरू होईल. या पार्श्वभूमीवर मतदारयाद्या अंतिम करण्याचे काम सध्या अंतिम टप्प्यात आहे. नव्या प्रभाग रचनेनुसार जिल्हा परिषदेचे ६१ गट आणि पंचायत समित्यांच्या १२२ गणांसाठी निवडणुका होणार आहेत. त्यांचे आरक्षणही नुकतेच निश्चित झाले आहे. गट आणि पंचायत समितीच्या गणांची अंतिम रचनाही झाली आहे. जिल्हा परिषद अध्यक्ष आणि पंचायत समित्यांच्या सभापतींचे आरक्षणही जाहीर झाले आहे. एकूण ६१ गटांपैकी ३१ गट महिलांसाठी राखीव आहेत. आता फक्त निवडणुकीची घोषणा होण्याची प्रतीक्षा आहे.

सर्वाधिक म्हणजे मिरज तालुक्यात ११, वाळवा तालुक्यात ११ आणि जत तालुक्यात ९ गट आहेत. खानापूर, कवठेमहांकाळ, पलूस, कडेगाव, शिराळा व आटपाडीत प्रत्येकी ४ गट आहेत. तासगावमध्ये ६ गट आहेत. त्यामुळे सर्वाधिक गट असणारे मिरज, वाळवा आणि जत हे तीन तालुके जिल्हा परिषदेत सत्ता मिळविण्याच्या दृष्टीने किंगमेकर ठरू शकतात. जिल्ह्यातील एकूण मतदारसंख्या आहे. निवडणूक आयोगाकडील माहितीनुसार, एका गटासाठी सरासरी २९ हजार ८१५ मतदार राहणार आहेत.

राज्यातील बहुतांशी जिल्हा परिषद आणि पंचायत समितीची मुदत संपून पावणेचार वर्षे होऊन गेली आहेत. सध्या या संस्थांवर प्रशासकीय राजवट आहे. आता तब्बल पावणेनऊ वर्षांनंतर जिल्हा परिषद आणि पंचायत समितीचीही निवडणूक होत आहे. यासाठी जिल्हा गट आणि पंचायत समितीच्या गणांची अंतिम रचनाही झाली आहे. मतदारसंख्येमध्ये सांगली जिल्हा राज्यात १० व्या स्थानी आहे. बीडमध्ये सर्वाधिक ५७ हजार ५६७, तर पुणे जिल्ह्यात सरासरी ४० हजार ८३३ मतदार आहेत. नजीकच्या सातारा व कोल्हापूर जिल्ह्यांची सरासरी मतदारसंख्या सांगली जिल्ह्यापेक्षा जास्त आहे.

१८ लाख मतदारसंख्या

जिल्हा परिषद निवडणुकीसाठी सर्वाधिक मतदारांची संख्या पुरुषांची आहे. प्रारूप मतदार यादीनुसार एकूण मतदारसंख्या १८ लाख १२ हजार इतकी आहे. जिल्ह्याची मतदारसंख्या ३० लाखांवर असली, तरी त्यामधून महापालिका क्षेत्र व नगरपालिका, नगर परिषदा व नगर पंचायतींची सुमारे १२ लाख मतदारसंख्या वजा होते. उर्वरित १८ लाख मतदार जिल्हा परिषद आणि पंचायत समित्यांच्या सदस्यांना निवडून देणार आहेत.

तालुकानिहाय गट अन् गण संख्या
मिरज - ११ - २२
वाळवा - ११ - २२
जत - ९ - १८
खानापूर - ४ - ८
कवठेमहांकाळ - ४ - ८
पलूस - ४ - ८
कडेगाव - ४ - ८
शिराळा - ४ - ८
आटपाडी - ४ - ८
तासगाव - ६ - १२