ऐतवडे बुद्रुक : वाळवा तालुक्यातील जक्राईवाडी, शिवपुरी, लाडेगाव, ऐतवडे बुद्रुक, करंजवडेसह परिसरात जोरदार पाऊस झाला. अचानक आलेल्या पावसामुळे चिकुर्डे-इस्लामपूर मार्गावरून जाणाऱ्या वाहनधारकांची चांगलीच तारांबळ झाली. चिकुर्डे- इस्लामपूर रस्त्यावर लाडेगावजवळील देसाई मळ्यात मुख्य रस्त्यावर झाड पडल्यामुळे वाहतूक ठप्प झाली होती. शेतकरी, वाहनचालकांनी ते झाड एका बाजूला ढकलल्यामुळे तासभरात वाहतूक सुरळीत झाली.
ऐतवडे बुद्रुक फाटा ते महाजन पानंदी दरम्यानच्या वाऱ्यामुळे झाडांच्या फांद्या रस्त्यावर पडल्यामुळे वाहतूक ठप्प झाली. परिसरातील विद्युत पुरवठा पूर्णपणे बंद झाला होता. विद्युत वाहिन्या तुटल्या होत्या. वळवाच्या पावसामुळे वातावरणात बदल झाला आहे. महावितरणचे मोठ्या प्रमाणात नुकसान झाले आहे. गेल्या महिनाभरात उकाड्याने हैराण झालेल्या लोकांना दिलासा मिळाला आहे. पावसाचा उपयोग पेरणीपूर्व मशागतीच्या कामांना होणार आहे. पाण्याविना ऊस पिके कोमेजली होती. या पावसामुळे त्यांना जरा संजीवनी मिळाली.
शेखरवाडी, कार्वे येथे मोठ्या प्रमाणात भाजीपाल्याचे उत्पादन घेतले जाते. अनेक शेतकऱ्यांनी कोथिंबीर, मेथी, पालक, टोमॅटो, आदि भाजीपाला केला होता. त्यामध्ये पाणी साचल्यामुळे पूर्णपणे तो भाजीपाला कुजून गेला आहे. त्यामुळे शेतकरी हवालदिल झाला आहे.