आरग येथे गणेशोत्सवाच्या पार्श्वभूमीवर पोलीस निरीक्षक चंद्रकांत बेंदरे यांनी बैठकीत मार्गदर्शन केले. यावेळी सरपंच सुरेखा नाईक, उपसरपंच विनोद बुरुड, बाबासाहेब शिंदे आदी उपस्थित होते.
लोकमत न्यूज नेटवर्क
लिंगनूर : यंदाच्या गणेशोत्सवात रस्त्यावर मंडप उभा करता येणार नाही. मंडळाचे अध्यक्ष, उपाध्यक्ष किंवा पदाधिकाऱ्याच्या घरातच मूर्तीची प्रतिष्ठापना करावी लागेल. कोरोना व लॉकडाऊनमुळे पोलिसांनी तसे आदेश जारी केले आहेत.
आरग (ता. मिरज) येथे ग्रामीण पोलिसांनी मंडळाच्या कार्यकर्त्यांच्या बैठकीत तशी माहिती दिली. निरीक्षक चंद्रकांत बेदरे, सरपंच सुरेखा नाईक, उपसरपंच विनोद बुरुड, व्यापारी संघटनेचे अध्यक्ष बाबासाहेब शिंदे, सदस्य एस. आर. पाटील, सर्जेराव खटावे, संदीप नाईक, बाबासाहेब पाटील, ग्रामसेवक नागेश कोरे आदी उपस्थित होते. बेंदरे म्हणाले की, सार्वजनिक जागेत किंवा रस्त्यावर उत्सव साजरा करता येणार नाही. मंदिरातही प्रतिष्ठापनेला परवानगी नाही. मंडळाच्या किंवा कार्यकर्त्यांच्या खासगी जागेत मंडप उभारता येईल. मंडळाची मूर्ती चार फुटांपेक्षा अधिक उंच असू नये. घरगुती उत्सवासाठीही दोन फुटांपेक्षा उंच मूर्ती घेऊ नये. स्वागताच्या व विसर्जनाच्या मिरवणुका काढता येणार नाहीत. वाद्येही वाजवता येणार नाहीत.
ते म्हणाले, कार्यकर्त्यांनी उत्सवाच्या पैशांतून आरोग्य शिबिरे घ्यावीत किंवा सामाजिक उपक्रम राबवावेत. एक गाव, एक गणपती उपक्रम राबवावा. उत्सव साधेपणाने साजरा करावा.
चौकट
बेंदरे म्हणाले की, कोरोनाच्या तिसऱ्या लाटेची शक्यता वर्तविण्यात येत आहे, त्यामुळे उत्सवात गर्दी करू नये. आदेशाचे उल्लंघन केल्यास कोरोना आपत्ती व्यवस्थापन कायद्यानुसार कारवाई केली जाईल.