सांगली : होलसेल रासायनिक खत विक्रेत्याला दहा टन युरिया पाहिजे असेल तर पाच टन मिश्र खते त्यांच्या माथी मारले जात आहे. रासायनिक खत कंपन्यांच्या या भूमिकेमुळे खत विक्रेत्यांची आर्थिक कोंडी झाली आहे. शेतकरी युरियाबरोबर मिश्र खते घेण्यास तयार नसल्यामुळे ते खत शिल्लक राहत आहे. मिश्र खतामध्ये लाखो रुपये होलसेल विक्रेत्यांचे अडकून पडत आहेत.
सध्या ऊस, मका पिकासाठी युरियाची गरज आहे. जत, आटपाडी, कवठेमहांकाळ तालुक्यात रब्बी पेरणी सुरू झाली आहे. या ठिकाणीही युरियाची मागणी वाढली आहे. युरियाची मागणी वाढताच रासायनिक खत कंपन्याकडून युरियाचा पुरवठा होत आहे. पण, युरियाबरोबरच होलसेल विक्रेत्यासच मिश्र खतांची सक्ती केली जात आहे. दहा टन युरियासाठी पाच टन मिश्र खताची सक्ती आहे. काही किलो ते दोन किलोच्या पिशवीतील महागडी ड्रीपची खतेही आहेत. या खताचा शेतकऱ्यांना काहीच उपयोग नाही. यामुळे शेतकरी मिश्र खते खेरिदी करत नाहीत. यामुळे होलसेल विक्रेत्याकडे मिश्र खते तशीच शिल्लक राहात आहेत. काही होलसेल विक्रेते स्वत:चा तोटा कमी करण्यासाठी युरिया घेणार असाल तर मिश्र खते तुम्हाला घ्यावीच लागतील, अशी सक्ती करत आहेत. खत कंपन्या आणि होलसेल विक्रेत्यांच्या मनमानी कारभाराकडे कृषी विभागाचे अधिकारी बघ्याची भूमिका घेत आहेत, असा आरोप शेतकरी संघटनांच्या पदाधिकाऱ्यांनी केला आहे.
चौकट
खताची लिकिंग झाल्यास कारवाई : विनायक पवार
शेतकऱ्यांची गरज नसेल तर त्यांच्यावर अन्य कोणत्याही रासायनिक खताची विक्रेत्याला सक्ती करता येणार नाही. याबाबत विक्रेते, खत कंपन्या युरियावर अन्य खताची सक्तीने विक्री करत असल्यास कृषी विभागाकडे लेखी तक्रार करावी. आम्ही संबंधितांवर तत्काळ कारवाई करू, असा इशारा जिल्हा परिषद कृषी विकास अधिकारी विनायक पवार यांनी दिला आहे.
चौकट
युरियाबरोबर मिश्र खताची सक्ती
रासायनिक खत कंपन्या युरियाबरोबर मिश्र खताची सक्ती करत आहेत. यामुळे होलसेल विक्रेते युरियाची खरेदी करत नाहीत. यामुळे जिल्ह्यात सध्या अनेक दुकानदाराकडे युरिया नाही. सध्या जो काही युरिया दिसत आहे, तो पॉसमशीनवरच दिसत आहे. यामुळे युरियाबरोबर मिश्र खताची लिकिंग करणाऱ्या कंपन्यावर कारवाई करावी, अशी मागणी शेतकरी संघटनेचे सुनील फराटे यांनी केली.